Müsavat Partiyası cəmiyyəti ictimai-siyasi fəallığa çağırıb

Bu günlərdə Müsavat Partiyasının Divanı 2013-cü ilin ilk toplantısını keçirib. 

Toplantıda partiyanın 2013-cü ili “Əbülfəz Elçibəy ili” elan etdiyi vurğulanıb. Divan bütün demokratik qüvvələri 2013-cü ildə Cümhuriyyətin 95, Elçibəyin 75 illik yubiley tədbirlərində fəallığa çağırıb.   

Divan üzvlərinə 2013-cü il seçki kampaniyası ilə bağlı təklif və tövsiyələrin hazırlanıb təqdim olunması tapşırılıb. Partiyanın seçki ilində Seçki Məcəlləsinin təkmilləşdirilməsi istiqamətində səylərini artıracağı qeyd edilib. Bu yöndə müstəqil hüquqşünasların hazırladığı seçki islahatına dair sənəd partiya başqanı İ.Qəmbər tərəfindən imzalanıb. 

Ölkədə ictimai-siyasi durumun müzakirəsində 2012-ci ilin siyasi və iqtisadi azadlıqların məhdudlaşdırılması, mülkiyyət hüquqlarının kütləvi şəkildə pozulması, siyasi repressiyaların güclənməsi, siyasi məhbusların sayının artması, hətta siyasi qətllərin olması ilə yadda qalması qeyd olunub. 

Divan demokratik islahatlar baxımından 2012-ci ili “itirilmiş il” sayıb. Toplantıda dövlət başçısı İlham Əliyevin beynəlxalq nüfuzlu təşkilat tərəfindən “ilin korrupsioneri” adlandırılmasına səbəb kimi islahatların aparılmaması,  korrupsiyanın dəhşətli şəkildə genişlənməsi və faktiki idarəetmə üsuluna çevrilməsi göstərilib.  

Eyni zamanda toplantıda Müsavat Partiyasının, İctimai Palatanın, bir sıra digər siyasi qüvvələrin, gənclər qurumlarının, vətəndaş cəmiyyəti fəallarının, fədakar media mənsublarının ardıcıl və cəsarətli fəaliyyəti nəticəsində 2013-cü ildə durumu dəyişməyin, ölkədə köklü demokratik dəyişikliklərə start verilməsinin mümkünlüyü göstərilib.-05D-