Müsavat partiyası rəsmi Bakını Avrointeqrasiya siyasətinə səsləyib

Bazar ertəsi Müsavat partiyası Divanının növbəti iclası keçirilib. Bu xəbər Turana partiyadan məlum olub.

Divan bu il mayın 19-da Bakıda hündürmərtəbəli binada yanğın nəticəsində həlak olan insanların xatirəsini yad edib. Bu faciə ilə bağlı rəsmi Bakının matəm elan etməməsi xalqın faciəsinə biganə münasibəti kimi qiymətləndirilib. Həm də hökumətin fövqəladə hallara hazır olmaması göstəricisi hesab edilib.  

Bu il mayın 22-də Müsavat Partiyasnın üzvü, gənc fəal Nərgiz Yaqublunun anım tədbirinin keçirilməsi qərara alınıb. N.Yaqublu ilə bağlı hazırlanan film onun xatirəsinə dəyərli töhvə sayılıb. Filmin həmmüəllifləri İzolda Ağayeva və Aytən Fərhadovaya təşəkkür elan edilib.

28 may – Cümhuriyyət günü münasibəti ilə Novxanıda M.Ə.Rəsulzadənin abidəsi önündə saat 12.00-da keçiriləcək bayram tədbirinə hazırlıqlarla bağlı məsələlər müzakirə olunub və müvafiq tapşırıqlar verilib.

Divan rəsmi Bakinin uzun illər apardığı balans siyasətinin iflasa uğradığını, nəticədə Azərbaycanın siyasi arenada təkləndiyini qeyd edib və bu siyasətdən imtina edərək, Avrointeqrasiya istiqamətində dərhal, ciddi addımların atılmasının zəruriliyini vurğulayıb.-05D-