Azərbaycan NATO ilə tərəfdaşlığa sadiqdir - İlham Əliyev (yeniləndi)

Azərbaycan NATO ilə tərəfdaşlığa sadiqdir. Bu barədə prezident İlham Əliyev martın 17-də NATO-nun baş katibi Yens Stoltenberqlə danışıqlardan sonra bildirib.

«Azərbaycan-NATO tərəfdaşlığının 30 ildən artıq davam edən uzun tarixi var. Tərəfdaşlığımız müsbət olmuşdur. Azərbaycan Kosovoda və Əfqanıstanda sülhməramlı əməliyyatlarda iştirak edib. Bu, bizim üçün böyük təcrübə olub. 2021-ci ilin axırında Əfqanıstanı tərk edən sonuncu müttəfiq qüvvələr bizim hərbi qulluqçularımız olmuşlar. Bu isə bir daha bizim əməkdaşlığımıza güclü sadiqliyimizi nümayiş etdirir», - Əliyev qeyd edib.

O, həmçinin Azərbaycanın müdafiə imkanlarının  müasirləşdirdiyini vurğulayıb.

Əliyev Ermənistanla münaqişənin hərbi-siyasi yolla həll edildiyini deyərək əlavə edib:  «Biz BMT Nizamnaməsinə əsasən özünümüdafiə hüququmuzdan istifadə etdik. Hazırda isə biz Ermənistanla sülh danışıqlarının fəal mərhələsindəyik. Mənim Brüsselə sonuncu səfərim zamanı mətbuat konfransında bu məsələyə toxundum və qeyd etdim ki, Azərbaycan belə bir təşəbbüs irəli sürüb və biz Ermənistanın cavabını gözləyirik. Sülh danışıqlarına başlamağın bizim təşəbbüsümüz olduğunu bir daha bildirmək istərdim. Bu günədək sülh sazişinin layihəsinə dair ermənistanlı həmkarlarla 7 dəfə şərhlərin mübadiləsi baş tutub. Xarici işlər nazirləri və sərhədlərin delimitasiyası ilə bağlı Baş nazirlərin müavinləri arasında keçirilmiş görüşlər məsələnin həlli üçün yaxşı imkanın olduğunu nümayiş etdirir. Bu yaxınlarda qeyd etdiyim kimi, biz sülhə heç vaxt olmadığımız qədər yaxınıq».

Sülhün əldə olunması, Cənubi Qafqazda çox ciddi dəyişiklilərə səbəb olacaq. Bu isə o deməkdir ki, burada çoxdandır gözlənilən sülh bərqərar olacaq.

Görüşdə  həmçinin enerji təhlükəsizliyi məsələsini müzakirə edilib.

«Bu gün Azərbaycan 8 ölkəyə qaz nəql edir ki, onların 6-sı NATO-ya üzv, digər ikisi isə NATO-nun tərəfdaş ölkəsidir. Əminəm ki, qarşıdan gələn illərdə tərəfdaşlarımızın sayı artacaq. Avropa Komissiyası Azərbaycanı etibarlı tərəfdaş və ümumavropa qaz təchizatçısı adlandırır. Bu isə həm böyük üstünlük, həm də böyük məsuliyyətdir», - daha sonra Əliev deyib.

O Azərbaycanın yaşıl keçid gündəliyi haqqında da  məlumat verib. «Azərbaycan yekdilliklə COP29-a ev sahibliyi edəcək ölkə seçilmişdir. Bu, bizim yaşıl keçidlə bağlı səylərimizin tanınmasının göstəricisidir. Zəngin təbii ehtiyatlara, qazıntı yanacağına malik ölkə olaraq biz tərəfdaşlarımızla birlikdə bərpaolunan enerji mənbələrinə sərmayə yatırırıq» ,  deyə Azərbaycan prezidenti vurğulayıb.

* * *

NATO-nun baş katibi  Cənubi Qafqaza səfərinə Bakıdan başlayıb

NATO-nun baş katibi Yens Stoltenberq Cənubi Qafqaz ölkələrinə üçgünlük səfərinə başlayaraq bazar günü martın 17-də Bakıya gəlib.

Prezident İlham Əliyevlə görüşdə baş katib Azərbaycanın Alyans ilə uzunmüddətli əməkdaşlığını alqışlayıb, tərəfdaşlığın daha da möhkəmlənməsinə ümid etdiyini bildirib.

Stoltenberq enerji təhlükəsizliyini müzakirə etmək fürsətini alqışlayaraq deyib: “Enerji bizim təhlükəsizliyimiz üçün vacibdir və mən Azərbaycanın bir sıra NATO müttəfiqləri ilə daha sıx əlaqələri inkişaf etdirməsini alqışlayıram”. O, daha sonra Kosovo və Əfqanıstan da daxil olmaqla NATO-nun rəhbərlik etdiyi əməliyyat və missiyalara verdiyi töhfələrə və Azərbaycanın NATO-nun “Sülh naminə tərəfdaşlıq” proqramında iştirakına görə Azərbaycana təşəkkür edib.

Cənubi Qafqazdakı vəziyyətdən danışan baş katib vurğulayıb ki, “sülh və sabitlik təkcə burada deyil, həm də daha geniş mənada təhlükəsizlik üçün vacibdir”. “Ermənistan və Azərbaycanın indi uzun illər davam edən münaqişədən sonra davamlı sülh əldə etmək imkanı var. Mən sizi bu fürsətdən istifadə etməyə və Ermənistanla davamlı sülh sazişi əldə etməyə çağırıram”.

Ukrayna ilə bağlı Stoltenberq deyib: «Mən Azərbaycanın Ukraynaya göstərdiyi çox zəruri dəstəyi alqışlayıram. Söhbət çox zəruri olan humanitar yardımdan gedir, lakin daha çox dəstəyə ehtiyac var, çünki Ukraynadakı vəziyyət olduqca ağırdır».

Baş katib Azərbaycanda keçiriləcək COP29 qlobal iqlim sammitini mühüm mərhələ adlandırıb: “Bu, iqlim dəyişikliyi ilə bağlı narahat olan hər kəs üçün vacibdir, lakin bu, bizim təhlükəsizliyimiz üçün də vacibdir, çünki bu məsələlər bir-biri ilə sıx bağlıdır”.

Bazar ertəsi baş katib xarici işlər naziri Ceyhun Bayramov və müdafiə naziri general-polkovnik Zakir Həsənovla görüşəcək. Daha sonra o, Gürcüstan rəhbərliyi ilə görüşlər üçün Tbilisiyə gedəcək. Çərşənbə axşamı Stoltenberq İrəvanda Ermənistan rəhbərliyi ilə görüşəcək.