NİDA: Bizim fəalların həbsi hakimiyyətin təxribatıdır

NİDA vətəndaş hərəkatı qurumun üç fəalının evində axtarış zamanı “Molotov kokteyli” və narkotik maddələrin aşkar edilməsi barədə  MTN və Baş Prokurorluğun birgə ittihamlarnı rədd edib.

Xatırladaq ki, MTN bəyan edib ki, NİDA üzvləri Bəxtiyar Quliyev, Şahin Novruzlu və Məhəmməd Əzizovun mənzillərindən “Molotov kokteyli”, markotik maddələr və pul aşkar edilib. Bunun əsasında gənclərə qarşı qanunsuz narkotik vasitələrin və partlayıcı maddənin saxlanması ilə bağlı ittiham irəli sürülüb.

Lakin onların doğmaları bu ittihamaları rədd edərək bildiriblər ki, bütün bunlar MTN-in əməkdaşları tərəfindən qoyulub.

“NİDA  bəyan edir ki, hüquq-mühafizə orqanlarının bu əməliyyatı siyasi sifariş əsasında həyata keçirilib və məqsəd hakimiyyətin mövcud siyasətinə etiraz edənləri susdurmaq, demokratik dəyərlər uğrunda mübarizə aparan hər kəsi qorxutmaqdır”, - bəyanatda deyilir.  

“Üzvlərimizin həbsi zamanı onlardan “aşkarlanmış” müxtəlif narkotik vasitələr, yandırıcı maddələr və pul şərləmə əməliyyatının tərkib hissəsidir və rejimin hər zaman opponentlərinə qarşı istifadə etdiyi, lakin bu dəfə biraz daha genişləndirdiyi bayağı ssenarilərin oxşarıdır. Bu əməllər göstərir ki, qanunlar çərçivəsində, müstəqil fəaliyyət göstərməli olan hüquq-mühafizə orqanları, siyasi hakimiyyətin sifarişlərini yerinə yetirən əlaltıya çevrilib”, - sənəddə vurğulanır.     

Əməliyyat fəal gənclər üzərində rejimin total qorxusunu bərpa etmək, 2013-cü il prezident seçkisi ilində rəqiblərin gözlərini qorxutmaq, siyasi meydanı bəribaşdan təzyiq altında saxlamaq və 10 mart gənclərin planlaşdırdığı “Əsgər ölümlərinə son” aksiyasının qarşısını almaq üçün qabaqlayıcı addımdır. 

NİDA  yerli və beynəlxalq ictimaiyyətin, hüquq- müdafiə təşkilatlarının və ictimai-siyasi qurumların məsələyə reaksiya verməsini və daha çevik münasibət bildirməsini gözləyir.

NİDA həmçinin qeyd edir ki, öz fəaliyyətində qeyri-zorakı mübarizə üsullarına tərəfdardır.  

NİDA  hakimiyyətin 10 mart aksiyasında da provokasiyalara əl ata biləcəyini istisna etmir  və bildirir ki, təşkilatın üzvləri aksiyada iştirak edəcəklər və hər zaman  qeyri-zorakılıq prinsiplərinə sadiq qalacaqlar.—06/16D-