Paşinyan: “Ermənistan Azərbaycanın humanitar addımlarına cavab verməyə hazırdır”

Bakı/26.06.21/Turan: Ermənistanda siyasi böhran başa çatıb və indi mühüm işlərə keçməyin vaxtıdır. Bunlardan biri Avropa İttifaqı ilə münasibətlər, əsasən genişləndirilmiş və hərtərəfli tərəfdaşlıq haqda müqavilənin bəndlərinin reallaşmasıdır.    Bu barədə Ermənistanın baş nazirinin səlahiyyətlərini icra edən Nikol Paşinyan ötən gün Yerevanda Avropa İttifaqı nümayəndə heyətini qəbul edərkən bildirib. O deyib ki, müharibədən sonrakı vəziyyət, həmçinin keçirilmiş seçkilər Ermənistanda demokratiyanın həyat qabiliyyətini müəyyənləşdirib və bu proses dönməzdir.

Görüşdə müharibədən sonra regiondakı vəziyyət müzakirə edilib. Paşinyan 15 erməni hərbi əsirin Azərbaycandan geri qaytarılmasında Avropa Şurasının rəhbəri Şarl Mişelin rolunu yüksək qiymətləndirib.

"Ermənistan Azərbaycanın humanitar addımlarına müvafiq hərəkətlərlə cavab verməyə hazırdır", - o 15 əsirin azad edilməsinə cavab olaraq Ağdamda minalanmış ərazilərin xəritələrinin Azərbaycana verilməsini nəzərdə tutaraq deyib.

Öz növbəsində qonaqlar Paşinyanı hakim Vətəndaş Müqaviləsi Partiyasının parlament seçkilərində qələbəsi münasibətilə təbrik ediblər və deyiblər ki, Avropa İttifaqı başlanmış islahatların reallaşmasına hər cür yardım etməyə hazırdır. Rumıniyanın xarici işlər naziri Boqdan Aureskunun sözlərinə görə, bu tərkibdə nümayəndə heyətinin regiona səfəri görünməmiş səfərdir. O, səfərin məqsədlərindən biri kimi Brüssel və Yerevan arasında əməkdaşlığın genişləndirilməsini göstərib. Auresku ümid edir ki, Ermənistan bu il martın 1-dən qüvvəyə minmiş sözügedən müqavilədən maksimum faydalanacaq. -02D-