Prezident İlham Əliyev: «Beynəlxalq birlik işğalçıya təzyiq göstərməlidir»

Bu gün BMT-nin Sivilizasiyalar Alyansının VII Qlobal Forumunun  açılış mərasimində çıxış edən Azərbaycan prezidenti İlham Əliyev tədbir iştirakçılarının diqqətini 20 ildən çoxdur ki, Ermənistanın BMT TŞ-nin Qarabağ nizamlanmasına dair qətnamələrinə məhəl qoymamasına yönəldib.

O, TŞ-nin qətnamələrinin icrasına seçici münasibətlə bağlı təəssüfünü bildirib.

“Beynəlxalq birlik, BMT Təhlükəsizlik Şurası erməni silahlı qüvvələrinin işğal olunmuş ərazilərdən çıxmasını tələb edir. Lakin Ermənistan buna məhəl qoymur. Bəzi hallarda BMT qətnamələri bur günün içində yerinə yetirilir, ancaq Azərbaycana gəldikdə isə 20 ildən çoxdur ki, icra olunmur.

ATƏT, Qoşulmamaq Hərəkatı, İslam Əməkdaşlıq Təşkilatı da analoji qərarlar qəbul ediblər.  Lakin Ermənistan onları yerinə yetirmir, işğalçıya heç bir beynəlxalq təzyiq göstərilmir”, - İ.Əliyev vurğulayıb.

O qeyd edib ki, münaqişənin nizamlanması “ərazi bütövlüyü prinsipinə əməl edilməsinə və Helsinki Yekun Aktına əsaslanmalıdır”.

İ.Əliyev bir daha bəyan edib ki, Azərbaycan istənilən yolla öz ərazü bütövlüyünü bərpa edəcək.

 “1988-ci ildən yüz minlərlə azərbaycanlı qaçqın düşüb, Ermənistandakı yaşayış yerini tərk etməyə məcbur olub. 700 mindən çox azərbaycanlı ölkənin ağır durumunda Qarabağdan məcburi köçkün düşüb”, - dövlət başçısı bildirib.

Son illər Azərbaycanda qaçqınlar və məcburi köçkünkər üçün 90 qəsəbə salınıb və bu işlər davam etdirilir. “Lakin həmin adamların bir hissəsi hələ də yataqxanalarda və pis şəraitdə ytaşayır”, - İ.Əliyev qeyd edib.—06D-