Prezident İlham Əliyev: “Ermənilər separatizmdən əl çəkməli və Azərbaycanın ərazi bütövlüyünü tanımalıdırlar”

Bakı/26.02.21/Turan: Ermənistan Azərbaycanın ərazi bütövlüyünü tanımalı və Qarabağda separatizmdən əl çəkməlidir. Hazırda Ermənistan və Azərbaycan rəsmiləri arasında görüşlər keçirilir və bu, irəliləyişə ümid etməyə əsas verir. Bu barədə prezident İlham Əliyev fevralın 26-da xarici jurnalistlər üçün keçirilən böyük mətbuat konfransında bildirib.

Eyni zamanda o etiraf edib ki, ermənilər heç də həmişə ardıcıl və səmimi olmayıblar. "Bizi aldatmağa çalışmasınlar. Verilən vədləri və razılaşmaları yerinə yetirmək lazımdır", -  o bildirib.

Qarabağın gələcək əhalisinə toxunan Əliyev vurğulayıb ki, orada ermənilərin Azərbaycan dövlətindən kənarda yaşaması mümkün deyil. "Hələlik ermənilərlə azərbaycanlılar arasında ünsiyyət yoxdur. Orada azərbaycanlı əhali hələ ki yoxdur, azərbaycanlılar qayıdanda ünsiyyət də başlayacaq. Bu, qaçılmazdır və gec - tez insanlar ümumi dil tapacaqlar", - İ.Əliyev qeyd edib. -02B-