Prezident İlham Əliyev: “Ermənistanda vəziyyət Bakının diqqət mərkəzindədir”

Bakı/26.02.21/Turan: “Biz Ermənistandakı vəziyyəti izləyirik və bu, bizi maraqlandırmaya bilməz. Bu, Ermənistanın daxili işidir və biz qarışmırıq. Hakimiyyətdə kim olursa-olsun, hadisələr necə inkişaf edirsə-etsin, 10 noyabr razılaşmasından imtina intihar olacaq". Bu barədə prezident İlham Əliyev fevralın 26-da mətbuat konfransında bildirib.

"Sənədin altında yalnız Ermənistanın baş naziri deyil, həm də Rusiya prezidentinin imzası var, razılaşmadan imtina Rusiyanın da nüfuzuna zərbə olardı. Rusiya prezidentinin dediyi kimi, bu, intihar aktı olardı", - İ.Əliyev deyib.

Nikol Paşinyanla ünsiyyətə gəlincə, indi ünsiyyət yoxdur. Azərbaycan prezidenti qeyd edib ki, Ermənistan baş nazirinin məlum bəyanatlarından və təxribatçı addımlarından sonra bu ünsiyyət dayandırılıb.

İşğal olunmuş ərazilərdə dəyən zərərə görə Ermənistanın məsuliyyətə cəlb edilməsi barədə sualın cavabında İ.Əliyev bildirib ki, dəymiş ziyanın hesablanması davam edir və sənədləşdirilir. Ölkə vətəndaşları kompensasiya tələbilə məhkəmələrə (yerli və beynəlxalq) müraciət edə biləcəklər. Burada müvafiq təcrübəyə malik olan beynəlxalq qurumlar da iştirak edəcəklər.

İşğal olunmuş torpaqlarda bizim təbii resurslarımızı qanunsuz istismar edən beynəlxalq şirkətlər də məsuliyyətə cəlb olunacaqlar. "Onlar bizə kompensasiya ödəməli və ya məhkəmələrdə cavab verməlidirlər", - prezident vurğulayıb.-02B-