Prezident İlham Əliyev �Star� zavodunun açılışında iştirak etmək üçün İzmirə gedib

Bakı/19.10.18/Turan: Prezident İlham Əliyev İzmir şəhərində "Star" neft emalı zavodunun açılış mərasimində iştirak etmək üçün oktyabrın 19-da Türkiyəyə işgüzar səfərə gedib.

"Star" neft emalı İzmir şəhərinin Əliağa rayonunda "Petkim PetroKimya Holding A.Ş."nin ərazisində tikilib.

"Star" neft emalı zavodu Türkiyədə özəl sektorda həyata keçirilən və son 30 ildə reallaşdırılan ən böyük özəl sektor layihəsidir. Zavodun təməli 2011-ci il oktyabrın 25-də Azərbaycan və Türkiyə prezidentləri İlham Əliyev və Rəcəb Tayyib Ərdoğan tərəfindən qoyulub.

Zavodun qurulmasında məqsəd "Petkim" neft-kimya kompleksinin xam maddəsi olan naftanın və Türkiyənin idxaldan asılı olduğu digər məhsulların istehsal edilməsidir. "Star"ın məhsullarının Aralıq dənizi və Cənubi Avropa ölkələri bazarlarına ixracı nəzərdə tutulur. Zavodun xammalı orta-ağır və açıq-boz xam neft, əsas məhsulları isə dizel və nafta olacaq.

"Star"ın istehsal gücü ildə 10 milyon ton (240 min barrel/gün) xam neft təşkil edir.

"Star" layihəsinin dəyəri ümumilikdə 5,7 milyard ABŞ dollarıdır. Bu məbləğin 3,3 milyard dollarlıq hissəsi İspaniyanın "CESCE", Yaponiyanın "JBIC" və "NEXI", Koreya Respublikasının "K-Sure", İtaliyanın "SACE" və ABŞ-ın "US Exim" kimi iri kredit təşkilatlarından borc kapitalı, qalan hissəsi isə səhm kapitalından təşkil olunub. Layihə özünü maliyyələşdirir və borclar zavod işə düşdükdən sonra "Star" tərəfindən ödəniləcək.-03D-