Prezident İlham Əliyev: “Sülh sazişi mümkün olduğu qədər qısa müddətdə imzalanmalıdır”

Bakı/31.03.22/Turan: Dövlət başçısı İlham Əliyev ümid edir ki, Avropa İttifaqı Şurasının prezidenti Şarl Mişelin iştirakı ilə Ermənistanın baş naziri Paşinyanla qarşıdakı görüş məhsuldar olacaq. Bu barədə o, cümə axşamı ATƏT-in fəaliyyətdə olan sədri, Polşanın xarici işlər naziri Zbiqnev Rau ilə görüşündə bildirib.

“Biz Azərbaycanla Ermənistan arasında sülhə doğru irəliləməliyik, mümkün olduğu qədər qısa müddətdə sülh sazişini imzalamalıyıq”, - Əliyev deyib.  

Onun sözlərinə görə, erməni tərəfi Bakının təkliflərini qəbul edir və bu, yaxşı əlamətdir. “Bu, çox yaxşı xəbərdir və mən ümid edirəm ki, Brüsseldəki görüşdə bu məsələyə daha çox aydınlıq gətiriləcək”, - o qeyd edib.

Öz növbəsində Zbiqnev Rau münaqişənin tezliklə həll olunacağına ümid etdiyini bildirib, mövcud vəziyyəti ümidverici adlandırıb.

O qeyd edib ki, Polşa şirkətləri Azərbaycanın işğaldan azad edilmiş ərazilərinin bərpası üzrə layihələrdə iştirakda maraqlıdırlar.-03D-