Prezident İlham Əliyev: “Türkiyəni qaralamağa cəhd edirlər”

Bakı/05.11.20/Turan: Türkiyə tərəfindən Azərbaycana heç bir hərbi dəstək yoxdur, hərbi texnikanın alınmasından başqa. Bu barədə prezident İlham Əliyev İspaniyanın EFE agentliyinə müsahibəsində bildirib. “Biz onu alırıq, müqavilələr imzalayırıq, hər şey şəffafdır, hər şey qanunidir”, - İ.Əliyev deyib. O qeyd edib ki, Azərbaycan başqa ölkələrdən də silah alır.

“Biz başqa ölkələrdən də silah alırıq. Nəyə görə heç kim bizim Rusiyadan nə qədər silah aldığımızdan danışmır?”

Türkiyə əfsuslar olsun ki, müxtəlif avropalı siyasətçilərin hücumuna məruz qalır. Türkiyəni qaralamaq cəhdləri var. Türkiyəni şantaj etmək, ona təzyiq göstərmək cəhdləri var. Türkiyənin bizə hərbi dəstək göstərdiyini deyənlər görə Rusiyanın Ermənistana hərbi dəstək göstərdiyini demir? Bizim əlimizdə sübutlar var, bu 40 gün ərzində Ermənistanın hansı məbləğdə silahla təchiz edildiyi ilə bağlı məlumatı Rusiya rəsmilərinə təqdim etmişik. Niyə heç kim bu barədə danışmır? Gəlin, ədalətli olaq”, - İ.Əliyev davam  edib.

“Siz müharibənin beynəlmiləlləşdirilməsindən qorxursunuz?” sualının cavabında İ.Əliyev deyib ki, “Ermənistan lap əvvəldən elə bunu etmək istəyirdi və biz həmişə buna qarşı idik”.

“Ermənistanın baş nazirinin Rusiya prezidentinə göndərdiyi məktub təkcə onların öz məğlubiyyətini artıq qəbul etdiyini, bizim döyüş meydanında onlara qalib gəldiyimizi göstərmir, eyni zamanda, onu göstərir ki, onlar münaqişəni beynəlmiləlləşdirmək istəyirlər, onlar Rusiyanı birbaşa müharibədə iştiraka sürükləmək istəyirlər, bu da tamamilə qəbuledilməzdir.

Mənim bildiyimə görə, bu, Rusiya tərəfindən rədd edilib”, - İ.Əliyev bildirib.

O həmçinin İranın Azərbaycanın ərazi bütövlüyünü nəzərdə tutan nizamlanma planını da göstərib.

“Türkiyənin mövqeyi yaxşı bəllidir. Həmçinin Gürcüstan da dəfələrlə Azərbaycanın ərazi bütövlüyünü dəstəkləyib. Bu, bizim qonşuların mövqeyidir. Ermənistan təcrid olunub. Buna görə də onlar münaqişəni beynəlmiləlləşdirmək istəyirlər. Lakin Ermənistan üçün ən yaxşı hərəkət öz məğlubiyyətini qəbul etmək və yerdə qalan torpaqları boşaldacaqlarına dair üzərinə öhdəlik götürməkdən ibarətdir”, - prezident deyib.

Ermənistan Dağlıq Qarabağın müstəqilliyini tanıyarsa, Azərbaycanın buna reaksiyası necə olardı? Bu sualın cavabında İ.Əliyev deyib: “Onlar müstəqilliyi tanımaq istəsəydilər, çoxdan tanıyardılar. Nəyə görə əvvəl tanımadılar? Çünki onlar başa düşürlər ki, bundan sonra danışıqlar olmayacaq. Onlar həmişə bundan təzyiq aləti kimi istifadə etmək istəyiblər.

“Mən dəfələrlə demişəm və indi də deyirəm: Ermənistanın baş naziri, bu gün Dağlıq Qarabağı tanı, bunu et, cəsarətini göstər, sözünün bir məna daşıdığını göstər, bu gün Dağlıq Qarabağı tanı. Yenə də siz görəcəksiniz ki, onlar bunu etməyəcəklər. Çünki onlar qorxaqdırlar, onlar yalnız dinc vətəndaşlara qarşı vuruşa bilirlər”, - İ.Əliyev vurğulayıb. –06D-