Prokurorluq Əli İnsanovu narkotikdə və nəzarətçilərə qarşı zorakılıqda ittiham edib (YENİLƏNİB)

Həbsdə saxlanılan keçmiş səhiyyə naziri Əli İnsanova qarşı yeni cinayət ittihamları irəli sürülüb.

Xüsusən, o, CM-in 234.1 (narkotik və ya psixotrop maddələrin qanunsuz əldə edilməsi və saxlanılması), 315.2 (hakimiyyət nümayəndəsinə qarşı müqavimət və ya zorakılıq) və 317-2.1-ci (cəzaçəkmə müəssisəsində qadağan edilmiş əşyaların hazırlanması, saxlanması) maddələri ilə ittiham olunur. Bu barədə Turan-a vəkil Toğrul Babayev bildirib.

Onun sözlərinə görə, İnsanovun üzərindən guya tərkibində psixotrop maddə olan dərman tapılıb. Amma İnsanov bildirib ki, bu dərmanın ona aidiyyatı yoxdur.

İnsanov cəzaçəkmə müəssisəsində bir təzyiq dərmanı içirdi və bunu ona rəsmi olaraq penitensiar müəssisə əməkdaşlarının nəzarəti altında verirdilər.

Bundan başqa, İnsanov guya cəzaçəkmə müəssisəsinin əməkdaşına güc tətbiq edərək müqavimət göstərib. 70 yaşlı alim müqavimət göstərməsi faktını inkar edir.

Üçüncü maddə də İnsanovun ittiham edildiyi dərmanla bağlıdır, deyə vəkil bildirib.

İnsanov öz növbəsində bildirib ki, azad edilməsinə 2 aydan az bir müddət qaldığı vaxtda yeni ittihamların irəli sürülməsi onu azadlığa buraxmamaq məqsədi daşıyır, deyə vəkil qeyd edib.

Elə bu gün Qaradağ rayon məhkəməsi İnsanovun iştirakı olmadan onun istintaq təcridxanasına köçürülməsi məsələsinə baxıb.

Müdafiə tərəfi ittihamlarla razı deyil və yeni vəsatətlər irəli sürmək niyyətindədir.

Hər üç ittiham üzrə İnsanovu 7 ilədək azadlıqdan məhrumetmə cəzası gözləyir. -06D-

2016 Avqust 24 (Çərşənbə) 14:53:19

İqtidara yaxın media orqanları sabiq səhiyyə naziri Əli İnsanova qarşı həbsdə olduğu 13 saylı cəzaçəkmə müəssisəsində qanunvericiliyə zidd olaraq məhbuslara dərman reseptləri yazması və qanunsuz olaraq həkimlik fəaliyyəti ilə məşğul olması ittihamı irəli sürüldüyünü bildirir.

Hazırda Əli İnsanovun vəkilləri telefonlara cavab vermir. Görünür, vəkillər cəzaçəkmə müəssisəsinə daxil olduqlarına görə telefonlarına cavab vermirlər.

Baş Prokurorluğun mətbuat xidməti Əli İnsanova qarşı cinayət işinin açılması ilə bağlı xəbərlərə münasibət bildirməyib.

“Hazırda tərəfimizdən müvafiq araşdırmalar aparılır. Yaxın zamanlarda bununla bağlı ictimaiyyətə məlumat veriləcək”, deyə Baş Prokurorluğun mətbaut xidmətindən Turan-a bildirblər.

Əli İnsanov hazırda iqtidarda olan Yeni Azərbaycan Partiyasının yaradıcılarından biridir. O, 1993-2005-ci illərdə Azərbaycanın səhiyyə naziri olub. Tibb elmləri doktorudur. Azərbaycan Milli Elmlər Akademiyasının akademiki olub.

İnsanova qarşı cinayət işinin qaldırlması tənqidlərlə qarşılanmaqdadır.

Vaxtı ilə onunla 13 saylı cəzaçəkmə  müəsissəsində məhbus həyatı yaşamış keçmiş vicdan məhbusu, Müsavat Partiası başqanının müavini Tofiq Yaqublu facebook səhifəsində yazıb ki, həbsxanada Əli İnsanova ən çox həbsxana işçiləri özləri müraciət edirdilər. “Hamısı da şəfa tapırdı. Hətta evdəki xəstələrini də o müalicə edirdi. Ona görə hamısı ona minnətdarlıq edirdilər. İndi isə ona qarşı belə itttiham irəli sürürlər. Əli İnsanovun həbsdən çıxmasına cəmi 60 gün qalmış ona qarşı saxta cinayət işi açılıb.  Ahıl yaşda akademiki 11 ildən sonra həbsdən azad etməyə cəsarətləri çatmır”, deyə o qeyd edir.

Müsavat Partiyasının başqanı Arif Hacılı bildirib ki, professor Əli İnsanova qarşı həbsxanada xəstələri yanlış müalicə etdiyi üçün yeni cinayət işi açılması artıq siyasi rəqiblərə qarşı repressiya siyasəti çərçivəsindən də çıxır.

“Bu, qisasçılıqdır. Hakimiyyət belə gülünc ittiham irəli sürməklə həm də cəmiyyəti saymadığını, ictimai-rəylə hesablaşmadığını nümayiş etdirir”, deyə Arif Hacılı yazıb.

AXCP sədri Əli Kərimli yazır ki, hazırki hökumətin səhiyyə sistemi yüzlərlə insanın canını alır.

“Siz isə akademik, keçmiş səhiyyə naziri Əli İnsanova qarşı yeni cinayət işi açırsınız ki, xəstələri qanunsuz müalicə edirmiş. Utanmaq hissi heçmi yoxdur? Əksər insanlar bilirdilər ki, cəza müddəti başa çatmaq ərəfəsində Əli İnsanova qarşı yeni cinayət işi açacaqsınız. Bilinmirdi ki, nəyi bəhanə edəcəksiniz, amma cəza müddəti başa çatsa da, onu həbsdən buraxmaycağınızı hamı gözləyirdi. Soruşursunuz ki, hardan bilirdi bunu xalq? Cavab verim, çünki xalq artıq onu idarə edənləri tanıya bilib. Nə qədər kinli, qəddar, siyasi rəqabətdən qorxan olduğunuzu da hamı yaxşı bilir. Öz kininiz sizi partladacaq. Bilmirsiniz ki, sirkə nə qədər tünd olsa, öz qabını partladar?”, deyə Kərimli facebook səhifəsində qeyd edib. -0-

2016 Avqust 24 (Çərşənbə axşamı) 09:45:06

   ““Əli İnsanovun hüquqları kobud şəkildə pozulur. Onun vəkilləri artıq 3 saatdan çoxdur ki, Qaradağ rayon prokuroru Natiq Abdullayevin keçirdiyi dindirmə prosesinə buraxılmır.  Biz dəfələrlə cəzaçəkmə müəssisəsinə buraxılmağımız və dindirmədə iştirakımızı tələb etmişik. Lakin hər dəfə deyirlər ki, tezliklə bizi ora buraxacaqlar, ancaq bu, hələ də olmayıb”, - keçmiş səhiyyə naziri Əli İnsanovun vəkillərindən biri Toğrul Babayev bildirib.

Vəkil qeyd edib ki, bu dindirmə Əli İnsanovun həbs müddətinin bitməsinə iki aydan az vaxt qaldığı zamanda baş verir.

Ə.İnsanovun dindirilməsinin səbəbləri indiyədək məlum deyil. Prokurorluq açıqlama verməkdən imtina edir. 03В-

* * *

Keçmiş səhiyyə naziri Əli  İnsanovun vəkilləri Toğrul Babayev və Şahverdi Ağaveyisi ötən gecə 13 saylı koloniyaya çağırıblar. Onlara bildiriblər ki, prokurur Ə.İnsanovu dindirəcək.

Lakin vəkillər koloniyaya gəldikdə onlara deyiblər ki, dindirmə səhərədək təxirə salınıb.

Saat  8.00-da vəkillər yenidən koloniyaya gediblər. Lakin hələlik onları içəri buraxmırlar. Eyni zamanda Qaradağ rayon prokuroru koloniyadadır, vəkil T.Babayev Turan-a bildirib.

Keçmiş nazirin dindirilməsinin səbəblərini vəkillərə açıqlamayıblar.

Ə.İnsanov 2005-ci ilin oktyabrında dövlət çevrilişinə cəhd ittihamı ilə həbs edilib. Lakin sonradan bu iş ayrıca icraata götürülüb və Ə.İnsanov iqtisadi cinayətlərə görə 11 il azadlıqdan məhrum edilib.

Avropa İnsan Hüquqları Məhkəməsi Ə.İnsanovun hüquqlarının pozulduğunu tanısa da təkrar proses zamanı hökm dəyişməyib.

Bu ilin oktyabrında Ə.İnsanovun cəza müddəti bitir. Lakin nazirin gözlənilmədən dindirilməsi 70 yaşlı keçmiş naziri həbsdə saxlamaq məqsədilə ona yeni ittihamın irəli sürülməsi və ya əvvəlki ittihamın yenilənməsi  ilə  əlaqədar ola bilər.—03B06--