Qarabağ erməniləri gələcəklərinin Azərbaycanda olduğunu başa düşməyə başlayıblar - İ.Əliyev

Bakı/13.08.22/Turan: Ermənilər doğru nəticələr çıxarmasalar, "Qisas" əməliyyatı təkrarlanacaq və daha da sərt olacaq. Bu barədə prezident İlham Əliyev AzTV-yə müsahibəsində bildirib.

"Biz istəyirik ki, erməni silahlı birləşmələri Qarabağı birdəfəlik tərk etsin. Bu, Ermənistanın öhdəliyidir", deyə prezident əlavə edib ki, son günlər yüzlərlə erməni hərbçisi Qarabağ bölgəsindən çıxarılıb. Ermənistan bizim xəbərdarlıqlarımızı düzgün təhlil edib düzgün nəticə çıxarsaydı, buna ehtiyac qalmazdı, deyə o əlavə edib.

Laçındakı vəziyyətə toxunan Əliyev qeyd edib ki, bu şəhərin Azərbaycanın nəzarəti altına qaytarılması prinsipial məsələdir. O vurğulayıb ki, yeni yolun marşrutu Rusiya tərəfi ilə razılaşdırılıb.

"Bir neçə marşrut var idi və nəticədə bu marşrut seçildi. Rusiya Müdafiə Nazirliyi ən yüksək səviyyədə bu marşrutu bizimlə razılaşdırdı və təsdiqlədi. Əgər başqa cür olsaydı, biz Rusiyanın müvəqqəti nəzarətində olan ərazidə necə yol inşa edə bilərdik?", deyə Əliyev qeyd edib.

"Biz bu marşrutu Ermənistanla razılaşdırmalı deyildik. Çünki Ermənistanın buna heç bir aidiyyəti yoxdur. Sadəcə olaraq, Ermənistana bildirildi ki, Ermənistan sərhədinə çıxış hansı nöqtədən olacaq və onlar da öz tərəfindən yeni yolu o nöqtəyə gətirib çatdırmalı idilər. Amma əfsuslar olsun ki, bunu etmədilər", deyə o əlavə edib.

Əliyevin sözlərinə görə, Bakı yolun Ermənistan ərazisindəki hissəsini də tikməyi təklif edib, amma Yerevan imtina edib. Bakı Moskvaya avqustun 5-də tikintini başa çatdıracağı barədə məlumat göndərib və sülhməramlıların postlarının köçürülməsini xahiş edib. Ermənistan tərəfi isə öz hissəsini 2023-cü ilin sonuna qədər inşa edəcəyini bildirib.

"Bu, faktiki olaraq manipulasiyadır. Biz dedik, əgər belədirsə, onda biz avqustun 5-də Laçın dəhlizinə giririk, postlar qururuq və baxarıq sonra siz necə hərəkət edəcəksiniz. Ondan sonra Qarabağda yaşayan ermənilər bizə müraciət etdilər, xahiş etdilər ki, onlara avqustun sonuna vaxt verilsin. Biz də buna razı olduq. Eyni zamanda, Qarabağda yaşayan ermənilər bizə müraciət etdilər ki, Ermənistan sərhədinə birləşdiriləcək nöqtəyə qədər 4 kilometr qrunt yolu da Azərbaycan tiksin. Ona da biz razılaşdıq. Amma əlbəttə ki, Laçın şəhərindən, Zabux və Sus kəndlərindən qanunsuz məskunlaşmış insanlar çıxarılmalıdır...

Mən Dövlət qaçqınkoma göstəriş verdim, Laçın şəhərinin, Sus, Zabux kəndlərinin camaatı ilə əlaqə saxlasınlar və biz onları yaxın zamanlarda öz doğma yerlərinə qaytaracağıq", deyə Əliyev bildirib.

O, Ermənistanı bir və ya iki il sonra vəziyyətin onların xeyrinə dəyişəcəyi ilə bağlı xülya qurmamağa çağırıb. Vəziyyət yalnız Azərbaycanın xeyrinə dəyişəcək. "Laçın yolunun hadisəsi bunu daha da qabarıq şəkildə göstərdi ki, Ermənistan hakimiyyəti Qarabağda yaşayan ermənilərə öz təsir imkanlarını itirirlər. Əksinə, Azərbaycan hakimiyyəti öz təsir imkanlarını artırır. Bu, reallıqdır. Qarabağda yaşayan ermənilər açıq-aydın gördülər ki, Ermənistan hakimiyyəti onların problemlərini həll etmək iqtidarında deyil - nə təhlükəsizlik, nə iqtisadi, nə maliyyə, nə başqa. Heç bir problemi həll etmək iqtidarında deyil... Qarabağda yaşayan ermənilər bizim vətəndaşlarımızdır. Onlar bunu nə qədər tez dərk etsələr, o qədər də hamımız üçün yaxşı olar", deyə Əliyev sözünə davam edib.

Bu gün danışıqlarda hər hansı statusdan ümumiyyətlə söhbət getmir. Söhbət Qarabağda yaşayan ermənilərin hüquqlarından və təhlükəsizliyindən gedir və bunu Azərbaycan dövləti təmin edəcək, deyə Əliyev bildirib. O, nümunə kimi yerli ermənilərin yeni yolu tikən Azərbaycanlı inşaatçılar ilə təmaslarını göstərib. Əvvəlcə orada sülhməramlılar var idi, amma son 6-7 aydır ki, onlar gediblər, çünki heç kimi qorumağa ehtiyac yox idi, deyə Əliyev bildirib.

"Bizim inşaatçılar oradakı kəndlərdə yaşayan yerli ermənilərlə təmasda idilər, hətta onların bəziləri gəlib kömək edirdi, təşəkkürünü bildirirdi ki, belə keyfiyyətli yol tikirik. Nəinki Qarabağın, Ermənistanın tarixində belə keyfiyyətli yol olmayıb. Onların tikdirdiyi yollar indi dağılır, bir il hələ keçməyib. Ona görə bu təmaslar artıq gedir və bu, çox önəmlidir, mən də bunu alqışlayıram. İnsanlar arasındakı təmaslar uzunmüddətli, sülhə xidmət göstərəcək", deyə Əliyev vurğulayıb.

"Qarabağda yaşayan ermənilər düzgün addım atmalıdırlar, başa düşməlidirlər ki, onların gələcəyi ancaq Azərbaycan cəmiyyətinə inteqrasiyadan keçir. Başqa cür mümkün deyil. Yəni, biz real həyatda yaşayırıq. Həm iqtisadi, həm coğrafi, həm nəqliyyat nöqteyi-nəzərdən Qarabağ Azərbaycanın ayrılmaz hissəsidir, tarix nöqteyi-nəzərdən, beynəlxalq hüquq nöqteyi-nəzərdən tərkib hissəsidir. Əgər Qarabağda kimsə yenə də, bilmirəm, hansısa populizm naminə, yaxud da ki, indi, necə deyərlər, kimdənsə qorxduğu üçün hansısa statusdan, müstəqillikdən söhbət aparırsa, bilmək lazımdır ki, o, erməni xalqının birinci düşmənidir. Çünki Qarabağda yaşayan ermənilərin nə statusu olacaq, nə müstəqilliyi olacaq, nə də ki, hansısa xüsusi imtiyazı olacaq. Azərbaycan vətəndaşları necə, onlar da elə. Azərbaycan vətəndaşlarının hüquqları necə qorunursa, onların da elə. Azərbaycanda yaşayan xalqların hüquqları necə qorunursa, onların da elə", deyə İlham Əliyev qeyd edib. 02D