QHT koalisiyası bələdiyyələrdə islahatların aparılmasına dair təşəbbüslər irəli sürür

Azərbaycanda bələdiyyələr yerli demokratiya və hakimiyyət institutu kimi formalaşmayıb, odur ki, yerli özünüidarəetmədə ciddi islahatlara ehtiyac var. Oktyabrın 16-18-də Avropa Yerli və Regional Hakimiiyətlər Konqresin (AYRHK) sessiyasında Azərbaycan üzrə qəbul olunmuş tövsiyələrlə bağlı çərşənbə günü keçirilən “dəyirmi masa”nın leytmotivi belə olub. Görüş Bələdiyyələrin İnkişafı Naminə QHT Alyansı tərəfindən təşkil edilib. 

Alyansın koordinatoru, İqtisadi Təşəbbüslərə Yardım  İctimai Birliyinin rəhbəri Azər Mehdiyevin sözlərinə görə, sənədlər AYRHK-nın bu ilin aprelində baş tutmuş monitorinq missiyasının əsasında qəbul edilib. A.Mehdiyev diqqəti ona yönəldib ki, missiyanın hesabatında vurğulanıb ki, Azərbaycan hakimiyyətinə ünvanlanan əvvəlki tövsiyələr yerinə yetirilməyib. 

Alyansın eksperti Rövşən Ağayev qeyd edib ki, Azərbaycan qanunvericiliyində “yerli özünüidarəetmə” anlamı yerli idarəetmə üzrə Avropa xartiyasının tələblərinə uyğun deyil. Əsasən bələdiyyələrə yerli dövlət hakimiyyəti səlahiyyətləri şamil edilməyib. 

AYRHK hesab edir ki, Azərbaycanda yerli idarəetmədə paralellik mövcuddur: o, yerli icra hakimiyyəti orqanları və səlahiyyətləri olduqca məhdud olan bələdiyyələr tərəfindən həyata keçirilir. Reallıqda bələdiyyələr icra hakimiyyətinin tabeliyindədir. Bələdiyyələrin maliyyə bazası da zəifdir. Lakin ən böyük tənqidə səbəb seçkili meri olan ümumşəhər bələdiyyəsi ilə bağlı xüsusi statusun olmamasıdır. 

R.Ağayev AYRHK-nın tövsiyələri barədə danışıb. Əsasən orada bələdiyyələrin dövlət hakimiyyətinin desentralizasiyasını həyata keçirən idarəetmə orqanları kimi tanınmasına çağırış var. Bələdiyyələrin status və səlahiyyətlərinin genişləndirilməsi, seçkili meri olan Bakı bələdiyyəsinin yaradılması təklif olunur.

Müzakirələrdə iştirak edən müxalifət siyasi partiyalarının nümayəndələri hesab edirlər ki, Azərbaycanda hakim rejim dəyişmədən real yerli demokratiya gözləmək olmaz. “İndiki bələdiyyə sistemi mahiyyətcə feodal rejimdir. Ölkə regionlar və sahələr üzrə məmur-oliqarxlar arasında bölünüb, hakimiyyətinin desentralizasiyasından və bələdiyyələrin inkişafından söhbət belə gedə bilməz”, - AXCP sədrinin müavini Nurəddin Məmmədli bildirib.

REAL vətəndaş hərəkatının üzvü Natiq Cəfərli qeyd edib ki, hakim elita Bakıda bələdiyyənin yaradılmasından və mer seçkisindən imtina edir. Bir tərəfdən, 3-3,5 mln. əhalisi olan şəhərdə seçkili merə prezidentə alternativ kimi baxılır. Digər tərəfdən, bu post uğrunda hakimiyyətdaxili mübarizə hakim rejimin əsaslarını sarsıda bilər.  

Qaraçuxur qəsəbə bələdiyyəsinin üzvü Lyudmila Xəlilova bildirib ki, yerli özünüidarəetmə indiki statusla da uğurla inkişaf edə bilər, lakin maliyyə bazasının genişləndirilməsi lazımdır. Onun sözlərinə görə, Qaraçuxur bələdiyyəsi indiki maliyyə bazası şəraitində də yolların təmiri, abadlıq, mərasim evlərinin inşası üzrə layihələr həyata keçirir.

Müzakirələrin yekunlarına əsasən bələdiyyə sisteminin təkmilləşdirilməsinə  dair tövsiyələrin hazırlanması və onların hakimiyyətə təqdim olunması qərara alınıb.—06C-