Quba hadisələri üzrə məhkəmədə

Cümə günü Quba rayon məhkəməsində Füzuli Pənahovun sədrliyi ilə martın 1-də Qubada baş vermiş iğtişaşlarda ittiham olunan üçüncü qrupun işi üzrə iclas keçirilib.

    Müttəhimlər kürsüsündə 7 nəfər əyləşib. Dörd nəfər – Akif Əliyev, Qabil Əliyev, Səfər Qəribov və Zimistan Əmiraslanov həbsdədir, daha üç nəfər – Telman Dadaşov, Samir Abdullayev və Məmmədhəsən Əkbərov ölkəni tərk etməmə haqqında iltizam imzalayıb.

    Müttəhimlər CM-in 186.2.1 (başqasının əmlakını məhv etmə və böyük miqdarda ziyan vurma), 233 (ictimai asayişin pozulması), 315.2 (hakimiyyət nümayəndəsinə müqavimət göstərmə) maddələri ilə ittiham olunurlar.

    Quba Olimpiya Kompleksinin stadion administratoru vəzifəsində işləyən Akif Əliyevə qarşı həmçinin 127.2.3-cü (sağlamlığa az ağır zərbə yetirmə) maddəsi ilə ittiham irəli sürülüb.

    Vəkil Əsabəli Mustafayevin Turan-a verdiyi məlumata görə, bugünki iclasda ittiham aktı oxunub. Daha sonra təqsirləndirilən şəxslər ona münasibətlərini bildiriblər. Onlardan dördü irəli sürülən ittihamları tamamilə təkzib edib. Digər üç nəfər özlərini kiçik hüquqpozmalara yol verməkdə qismən təqsirli biliblər.

    Mustafayevin müvəkkili Əliyev ittihamı tamamilə təkzib edib.

    Mustafayevin sözlərinə görə, hakim vəkillərin onlarla vəsatətindən, demək olar ki, heç birini təmin etməyib. Vəsatətlər həbs cəzasının başqa qətimkan tədbirləri ilə əvəz olunması, cinayət işinə xitam verilməsi, Quba rayonunun keçmiş icra başçısı Rauf Həbibovun zərərçəkmiş deyil, şahid qismində cəlb edilməsi və s. məsələlərə aid olub.

    Məhkəmənin növbəti iclası noyabrın 6-da keçiriləcək.

    Qeyd edək ki, Quba məhkəməsində 8 və 9 nəfərdən ibarət daha iki təqsirləndirilənlər qrupunun işi üzrə dinləmələr davam edir.

    * 1 mart 2012-ci ildə Quba rayon icra başçısı Rauf Həbibovun yerli sakinlərin ünvanına təhqiredici ifadələrindən qəzəblənən minlərlə rayon sakini Həbibovun istefası tələbi ilə küçələrə çıxıblar. Aksiya iğtişaşlara dönüb, hadisələr zamanı rayon icra başçısının villası yandırılıb, daxili qoşunlarla qarşıdurmalar olub. Hakimiyyət 25 nəfəri həbs edib. -06B-