Qubad İbadoğlu hərəkət etməkdə çətinlik çəkir.

Bakı/04.10.23/Turan:  Həbsdə olan Azərbaycan Demokratiya və Rifah Partiyasının sədri Qubad İbadoğlu hərəkət etməkdə çətinlik çəkir.

Bu barədə siyasətçinin qardaşı Qalib Toğrul Turana məlumat verib. 

Onun sözlərinə görə, Q.İbadoğlunun səhhətində problemlər qalmaqdadır və xüsusilə, şəkərinin normallaşmaması, aortanın anevrizması xəstəliyinin proqressi və səngiməyən onurğa ağrıları daha çox narahatedicidir. 

Q.Toğrul qeyd edib ki, Qubad İbadoğlunun şəkəri normadan 3 dəfə artıqdır: "Ötən şənbə Bakı İstintaq Təcridxanasının Tibbi-Sanitar Hissəsinin rəisi Rəşad Hüseynli ilə görüşdə aortanın dibinin genişlənməsi tezliyinin və dəqiq ölçünün müəyyənləşdirilməsi üçün ən doğru müayinə üsulunun kontrast maye ilə Kompüter Tomoqrafiyası olduğunu bildirmişdim. Araşdıracağını demişdi. Bu gün Rəşad doktor qardaşıma müvafiq müayinə aparatının Ədliyyə Nazirliyinin Tibb Baş İdarəsi tabeliliyindəki müəssisələrdə olmadığını və müayinənin ancaq ailəmizin hesabına özəl klinikada aparıla biləcəyini deyib. Qubad müəllim dövlət büdcəsindən bu məqsədlə ayrılan milyonları xatırladandan sonra doktor bir söz demədən gedib".

O, vurğulayıb ki, qardaşının onurğadakı problemlər daha da kəskinləşib: "Qardaşım bel ağrılarının qarşısının alınması məqsədilə gündə 3 dəfə ağrıkəsici tabletka və onun mədəyə təsirini neytrallaşdırmaq üçün müvafiq dərman qəbul edir.

London həkimləri onurğadakı problemin qarşısını almaq üçün fizioterapiya məsləhət görmüşdülər, Azərbaycan hakimiyyəti məlum həbs qərarı ilə buna imkan vermədi".

Məsələ ilə bağlı Prnitensiar Xidmətindən məlumat almaq mümkün olmayıb.

ADR sədri Q.İbadoğlu iyulun 23-də həbs olunub. Onun barəsində 3 ay 26 gün həbs-qətimkan tədbiri seçilib.

Q.İbadoğlu Cinayət Məcəlləsinin 204.1-ci (satış məqsədi ilə hazırlama, o cümlədən saxta pul və ya xarici valyuta əldə etmə və ya satma), 204.3.1-ci (eyni əməllər mütəşəkkil dəstə tərəfindən törədildikdə) maddələri ilə ittiham olunur. Avqustun sonunda ona qarşı CM-nin 167-3.1-ci (dini ekstremist materialları hazırlama, saxlama və ya yayma) maddəsi ilə yeni ittiham irəli sürülüb.

Hüquq-mühafizə orqanları Q.İbadoğlunun Türkiyədə 2016-cı ildə çevriliş cəhdində ittiham olunan, hazırda Amerikada yaşayan ilahiyyatçı Fətullah Gülənin tərəfdarları ilə əlaqədar keçirilən əməliyyat tədbirləri çərçivəsində saxlanıldığını bildirib. Q.İbadoğlu isə ittihamı qəbul etmir, məhkəmədə onu "saxta" adlandırıb.-0-