Ramiz Mehdiyev keçmiş diaspor nazirini mənimsəmədə ittiham edib

Bakı/24.04.18/Turan: Prezident Administrasiyasının rəhbəri Ramiz Mehdiyev bu gün Diasporla İş üzrə Dövlət Komitəsinin yeni sədri Fuad Muradovu kollektivə təqdim edərkən qurumun keçmiş rəhbərliyini tənqid edib.

"Nazim İbrahimovun sədrliyi dövründə bu iş yaxşı təşkil olunmayıb. Dünyadakı azərbaycanlılarla bağlı görülən tədbirlər üçün ayrılan vəsaitlər müəyyən halda ünvanına çatmayıb. Sədr öz səlahiyyətlərini yerinə yetirə bilməyib. Böyük tədbirlər keçiriblər, amma konkret işlər həllini tapmayıb. Ona görə də prezident komitə sədrinin vəzifədən azad edilməsi üçün sərəncam imzalayıb", - R.Mehdiyev bildirib.

Öz növbəsində N.İbrahimov bu ittihamları şərh edərkən maliyyə mənimsəmələri ilə bağlı R.Mehdiyevin fikirlərini təkzib edib.

Qeyd edək ki, bir neçə il öncə İbrahimov qardaşlarından biri, Tağı İbrahimov ATV telekanalının sahibliyindən imtina etməli olub.

Digər qardaş "Xəzər adaları"nın müəllifi İbrahim Nehrəmlinin adı Beynəlxalq Banka olan kreditlərin qaytarılmaması ilə bağlı qalmaqalda keçir.-06D--