Ramiz Mehdiyevin tərəfdarları parlamentin vitse-spikerinin cəzalandırılmasını tələb edirlər

Bakı/23.09.20/Turan: Milli Elmlər Akademiyasının prezidenti Ramiz Mehdiyevin tərəfdarları parlament deputatlarına vitse-spiker Adil Əliyevdən şikayət ediblər.

Qalmaqalın səbəbi vitse-spikerin R.Mehdiyevi sərt tənqid etdiyi müsahibəsidir.

“Ramiz Mehdiyevdə zərrə qədər dövlətçilik şüuru olsaydı, tənqidə dözümlü yanaşar, emosiyalara qapılmadan səhvini etiraf edər və AMEA-nin prezidentliyindən istefa verib istirahətə gedərdi. O isə haqlı iradları süngü ilə qarşılayır”,- A.Əliyev qeyd edib.

Müsahibədə həmçinin  deyilir ki, Prezident Administrasiyasının keçmiş rəhbəri Ramiz Mehdiyev bu vəzifəni itirdikdən sonra öz nüfuzunu saxlamağa çalışır. Akademiyada oturduğu halda yenə də əvvəllər vəzifəyə təyin etdiyi şəxsləri qəbul edir, onlarla iclaslar keçirir.

“Bu adam hələ də ona verilən mesajı anlamaq fikrində deyil. Bir çox inzibati tədbirlər də onun bu inadkarlığı səbəbindən baş verdi”, -A.Əliyev deyib.

Sonra vitse-spiker daha 2012-2013-cü illərdə deputat Gülər Əhmədova ilə hay-küylü qalmaqalı xatırladıb. O, R.Mehdiyevin adından deputatlığa namizədlərdən pul yığırdı.

Qalmaqalın digər fiqurantı Sevinc Babayeva o zaman Türkiyəyə qaçdı və orada qəribə şəraitdə vəfat etdi.

“Bu gün başqalarına əxlaq dərsi keçən Ramiz Mehdiyev öz günahına görə qadınları güdaza verməsinin eybinə kor olmağı bacarmalıdır”, - vitse-spiker deyib.

O həmçinin Elmlər Akademiyasının səmərəsizliyini tənqid edib, onun saxlanmasına hər il on milyonlarla manat xərclənir, lakin orada ciddi tədqiqatlar yoxdur.

Bu ittihamlara cavab olaraq hakim Yeni Azərbaycan Partiyasının ərazi təşkilatı kollektiv şəkildə parlamentə müraciətində deputatları “vitse-spikerin məsuliyyətsiz və populist çıxışları”na münasibət bildirməyə çağırıb.06D-