REAL prezident seçkilərinə öz namizədi ilə gedə bilər

“Respublika alternativi” (REAL) vətəndaş hərəkatı 2013-cü il 16 oktyabr prezident seçkilərində öz namizədini irəli sürə bilər. Yanvarın 6-da təşkilatın İdarə Heyətinin iclasında bu məsələ müzakirə mövzusu olub.

REAL-ın sədri İlqar Məmmədov Turan-a bildirib ki, əgər bir ay ərzində seçkilərə dair təşəbbüsü ilə bağlı digər siyasi qüvvələrdən cavab almasa, öz namizədini irəli sürəcək. Belə ki, hələ yayda REAL öz namizədini irəli sürməməyə və müxalifətdən olan vahid namizədi dəstəkləməyə hazır olduğunu bəyan  etmişdi. Lakin vahid namizəd məsələsi hər zaman müxalifətin konsolidasiyasına əngəl törədib və sonda onun məğlubiyyətinə gətirib çıxarıb. 

“Hesab edirik ki, konsolidasiya keçid dövrü və uzaq perspektiv üçün aydın seçkiqabağı platforma əsasında olmalıdır; ölkənin gələcək rəhbərliyinin personal tərkibi üzrə təkliflərə; səsvermə gününə səkkiz ay qalmış vahid namizədin irəli sürülməsi barədə qəti vədə əsaslanmalıdır. 

Təəssüf ki, hələlik biz həmin təkliflərə dair cavabları eşitməmişik. Odur ki, bir ay da gözləyəcəyik və seçkilərdə iştirakla bağlı yekun qərar qəbul edəcəyik. Çox güman ki, REAL seçkilərə öz namizədi ilə gedəcək”, - İ.Məmmədov vurğulayıb. 

*REAL  2008-ci ilin sonlarında yaradılıb. Lakin aktiv siyasi fəaliyyətlə 2011-ci ildən məşğul olur. Hazırda hərəkatın üzvlərinin sayı 1000 nəfərə yaxındır. 

REAL-ın kredosu “REAL: Respublika, Etibarlılıq, İnsan, İrəliləyiş” formulundə əksini tapır. —06B—