RF səfirliyi Azərbaycandakı Rusiya vətəndaşlarını geri daşıyan aviareyslərə biletlərin satışı ilə bağlı vəziyyəti şərh edib

Bakı/06.08.20/Turan: 2020-ci il avqustun 5-də Turan İnformasiya Agentliyinin "Bakı-Moskva-Bakı xüsusi reysi ilə bütün arzu edənlər səyahət edə bilməyib" başlıqlı xəbər dərc edildikdən sonra RF-nin Azərbaycandakı səfirliyi vəziyyətə aydınlıq gətirmək üçün rəsmi şərh yayıb.

"Bilet satan yerli agentliklərə istinadla dərc edilmiş 2020-ci il 5 avqust tarixində həyata keçirilən Bakı-Moskva reysinə aviabilet almış şəxslərin təyyarəyə minmək üçün əlavə olaraq "Rusiyanın Bakıdakı səfirliyindən icazə və kod" almalı olması barədə iddialar həqiqətə uyğun deyil. Məsələnin mahiyyəti ondan ibarətdir ki, müştəriyə xüsusi aviareysə heç bir rəsmi razılıq olmadan ticari əsaslarla müntəzəm reys kimi biletlər satılıb", deyə RF-nin diplomatik nümayəndəliyinin saytında dərc edilmiş press-relizdə bildirilir. 

Səfirlik xatırladır ki, Rusiya və Azərbaycan arasında müntəzəm aviasiya əlaqəsi qeyri-müəyyən müddət üçün dayandırılıb. İki ölkə arasında müstəsna olaraq geri daşıma aviareysləri həyata keçirilir, bu reyslərə yalnız Rusiya Dövlət və Bələdiyyə Xidmətləri Vahid Portalı (www.gosuslugi.ru/395431/1) vasitəsilə müvafiq ərizə vermiş şəxslər qeydiyyatdan keçə bilər. Bu ərizələr əsasında Rusiyanın Rabitə Nazirliyi Rusiya Aviasiyası ilə birlikdə RF-yə qayıdan Rusiya vətəndaşlarının siyahısını tərtib edir və bu barədə onlara özü məlumat verir. Bu zaman sərnişinlər yalnız sözügedən siyahıya daxil edildikdən sonra aviabilet üçün ödəniş edə bilər. Səfirliyin vətəndaşların geri  daşıma aviareyslərinə qeydiyyatı ilə heç bir əlaqəsi yoxdur.

Geri daşıma aviareyslərindən istifadə etmək istəyənlər Azərbaycandan Rusiyaya çarter reyslər haqqında aktual məlumatı rəsmi t.me/Azerbaijan_rf_covid19 teleqram kanalında əldə edə bilərlər. Azərbaycandan çıxış məsələləri ilə bağlı rəsmi ünsiyyət kanalı: t.me/Azerbaijan_talks. Ərizənin cari statusunu www.sos.midhelp.ru/status linkindən yoxlamaq olar.

Səfirlik Rusiya vətəndaşlarına müntəzəm aviasiya əlaqəsinin bərpa edilməsi haqqında rəsmi dövlətlərarası qərar olmadan Azərbaycandan Rusiyanın şəhərlərinə birbaşa marşrutla uçan hər hansı aviareysə bilet almağı tövsiyə etmir.

Səfirlik KİV-ə müraciət edərək, Rusiya vətəndaşlarının Azərbaycan ərazisindən daşınması ilə bağlı məlumatlarda və şərhlərdə Rusiyanın Azərbaycandakı Səfirliyinin (www.azerbaijan.mid.ru) və Rusiya XİN-in (www.mid.ru) aktual rəsmi məlumatlarını rəhbər tutmağı xahiş edir. -06В-