R.Hacılı: Anar Məmmədliyə qarşı irəli sürülmüş ittihamlar tutarsızdır

Baş Prokurorluq Seçkilərin Monitorinqi və Demokratiyanın Tədrisi Mərkəzinin (SMDT) rəhbəri Anar Məmmədlinin dekabrın 16-da həbs edilməsi ilə bağlı məlumat yayıb.

Məlumata əsasən, Vergilər və Maliyyə nazirliklərindən SMDT-nin və “Könüllülərin Beynəlxalq Əməkdaşlığı” ictimai birliyinin (KBƏİB) vəzifəli şəxslərinin vəzifə səlahiyyətlərindən sui-istifadə edərək, “külli miqdarda gəlir əldə etməklə və vergiləri ödəməkdən yayınmaqla qanunsuz sahibkarlıq fəaliyyəti ilə məşğul olmaları” haqqnda materiallar daxil olub.

Buna əsasən, oktyabrın 29-da 192.2.2 (külli miqdarda gəlir əldə etməklə qanunsuz sahibkarlıq), 192.2.3 (mütəşəkkil qrup tərkibində qanunsuz sahibkarlıq), 213.2.1 (mütəşəkkil qrup tərkibində vergi ödənişindən yayınma), 213.2.2 (böyük ölçüdə vergi ödənişindən yayınma) və 308.2-ci (nəticələrə təsir göstərmək məqsədilə vəzifə səlahiyyətlərindən sui-istifadə) maddələri ilə cinayət işi başlanıb.

İstintaq zamanı QHT-lərə Dövlət Dəstəyi Şurasının ekspertləri cəlb edilməklə, sözügedən qurumların fəaliyyəti yoxlanılıb.

İstintaq müəyyən edib ki, SMDT rəhbəri Anar Məmmədli və icraçı direktoru Bəşir Süleymanlı 2012-ci ilin may ayında KBƏİB rəhbəri Elnur Məmmədovla ABŞ Milli Demokratiya İnstitutunun 276 010 dollar məbləğində qrantını bu QHT-nin rəsmiləşdirmək barədə razılıq əldə ediblər.

Bundan sonra Süleymanlı KBƏİB-in vitse-prezidenti təyin edilib.  O, bank hesabına köçürülmüş 163250 ABŞ dolları onun vasitəsilə nağdlaşdıraraq, hüquqi şəxs statusu olmadığı halda SMDT-nin ictimai əlaqələr üzrə menecer, hüquqşünas, ekspert və digər vəzifələrə işçi qəbulu elan edib özlərinə, işçilərə, eləcə də layihəyə cəlb edilmiş digər şəxslərə həmin pul vəsaitindən əmək haqqı, xidmət və ofislərin icarə haqqı ödənilməsi üçün istifadə edib. Ümumilikdə 109529 manat məbləğində gəlir əldə olunub və Vergi Məcəlləsinin 219.1-ci maddəsinə əsasən, dövlət büdcəsinə ƏDV olaraq 19 535 manat ödənilməyib.

Həmçinin, KBƏİB rəhbəri Məmmədovun QHT təsisçilərinin imzalarını saxtalaşdırması haqqında şübhələr var.

Araşdırmanın nəticələrinə görə Anar Məmmədli və Bəşir Süleymanlıya qarşı 192.2.2, 213.1 və 308.2-ci, Məmmədova qarşı isə 192.2.2, 213.1, 308.2 və 313-cü (vəzifə saxtakarlığı) maddələrlə ittihamlar irəli sürülüb.

Süleymanlı və Məmmədovdan başqa yerə getməmək haqqında iltizam alınıb, Məmmədli isə həbs edilib.

İstintaq davam etdirilir, deyə məlumatda bildirilir.

Qeyd edək ki, SMDT 2008-ci ildə hakimiyyətin dövlət qeydiyyatından məhrum etdiyi Seçkilərin Monitorinqi Mərkəzinin bazasında yaradılıb. Bu zaman SMDT bütün bu illər ərzində dövlət qeydiyyatı əldə etməyə çalışıb. Dövlət qeydiyyatının olmaması bu QHT-ni layihələrin həyata keçirilməsinə digər QHT-ləri cəlb etmək məcburiyyətində qoyub.

Məmmədlinin vəkili, Media Hüquqları İnstitutunun (MHİ) direktoru Rəşid Hacıllı Baş Prokurorluğun bəyanatını Turan-a şərh edərkən ona qarşı irəli sürülən qanun pozuntularının tutarsız olduğunu bildirib.

SMDT maliyyə agenti kimi çıxış edən başqa QHT-ni cəlb edib. Azərbaycanda uzun illərdir belə bir təcrübə mövcuddur. Buna görə qanunsuz sahibkarlıq fəaliyyəti haqqında iddia əsassızdır. Hər-hansı vəsaitin mənimsənilməsi haqqında ittiham da əsassızdır.

Söhbət Milli Demokratiya İnstitutunun qrantından gedir və bu qurum vəsaitlərin mənimsənilməsi iddiası ilə çıxış edə bilər. Mənimsəmə faktı yoxdursa, vergi ödənişindən, xüsusən ƏDV ödənişindən yayınma ittihamı məntiqsizdir.

Hüquqşünas hər-hansı maliyyə pozuntuları olması ehtimalının çox kiçik olduğunu hesab edir, belə ki, MDİ hər rüb vəsaitlərdən istifadə haqqında hesabat tələb edirdi.

Bundan başqa, prokurorluğun vətəndaş cəmiyyəti fəallarının cinayət əməlləri törətmiş şəxslər kimi təqdim edildiyi bir məlumat yayması faktı özü qanun pozuntusudur. Bu, təqsirsizlik prezumpsiyasının pozulmasıdır, deyə Hacılı bildirib.

“Seçkilərin saxtalaşdırılması” ittihamına gəlincə, vəkil bunu cəfəng adlandırıb. -06D-