R.İbrahimbəyov: RATİ Kremlin layihəsi deyil

 Rusiya Azərbaycan Təşkilatları İttifaqı (RATİ) Ümumrusiya Azərbaycanlıları Konqresinin (ÜAK) fəaliyyətsizliyi ilə bağlı yaradılıb və məqsədi Rusiyada aazərbaycanlıların hüquqlarını qorumaqdır. Bu barədə bir sıra jurnalistlərə müsahibəsində RATİ-nin təsisçilərindən və Əlaqələndirmə Şurasının üzvlərindən biri, kinodramaturq Rüstəm İbrahimbəyov bildirib.  

Onun sözlərinə görə, ÜAK 12 il əvvəl yaradılıb və Heydər Əliyev məşhur azərbaycanlı sahibkarlardan orada iştirak etməyi xahiş edib. Amma iki il əvəl Bakıdan ÜAK-ın işinə müdaxilə başlayıb, struktur dəyişib, vitse-prezidentlik ləğv edilib. Digər tərəfdən, ÜAK təkrar qeydiyyata alınmayıb və faktik olaraq fəaliyyətsizdir. Buna görə RATİ-ni yaratmaq qərara alındı, deyə o bildirib. 

RATİ-yə lider kimi keçmiş baş nazirin müavini Abbas Abbasovun seçilməsinə gəlincə, Abbasov kimi hörmətli və zəngin adamın olması azərbaycanlıların problemlərinin həllinə kömək edər. 

Azərbaycan hakimiyyətinin RATİ-nin yaradılmasından təşvişə düşməsi İbrahimbəyov üçün anlaşılmazdır. «Gah deyirlər, onu Kreml yaradıb, gah Paşayevlərin, gah Rəsul Quliyev və Eldar Namazovun adını çəkirlər», - deyə  İbrahimbəyov bildirib.  

Digər tərəfdən, Azərbaycan mətbuatının milyarderlər adlandırdığı sahibkarlar vitse-prezidentlik institutunu ləğv edərək faktik olaraq ÜAK-dan çıxarıldıqları üçün inciyiblər. Onlar deyir ki, «bizə hörmət etmirlərsə, onlara pul verməyəcəyik».

İbrahimbəyovun sözlərinə görə, Abbasov prezident İlham Əliyevlə görüşüb əmin etmək istəyir ki, RATİ ona qarşı deyil. Amma onu qəbul etmirlər. İbrahimbəyovun fikrincə, Abbasova təzyiq başlasa və onun əmlakını əlindən alsalar, hakimiyyətin daha bir düşməni yaranacaq. 

İbrahimbəyov RATİ-nin yaradılmasında Kremlin rolunu inkar edir. RATİ-nin yaradılmasının Bakı ilə razılaşdırılmamasına gəlincə, «milyarderlər hesab edir ki, RF vətəndaşı olduqları üçün Azərbaycan rəhbərliyindən icazə almağa lüzum yoxdur.

“Milyarderlərdən hər hansı biri Azərbaycanın İvanişvilisi ola bilərmi?” sualına cavab olaraq İbrahimbəyov deyib ki, hələlik belə bir şey görmür. Onun fikrincə, bu adamlar daha çox biznes barədə düşünürlər. 

İbrahimbəyov həmçinin bildirib ki, Azərbaycan rəhbərliyi ölkədə dəyişikliklər etməsə, inqilab labüddür.—06D-