Rusiya silah tenderinin pozulması ilə əlaqədar Ermənistana etiraz notası göndərəcək

Moskva/24.10.19/Turan: Moskva Rusiyanın ORSIS şirkətinin iştirak etdiyi silah tenderinin pozulması ilə əlaqədar Yerevana etiraz notası göndərəcək, xəbəri RİA Novosti yayıb.

Mayda respublkanın Müdafiə Nazirliyi tarixində ilk dəfə bir neçə milyon dollar məbləğinda hərbi texnikanın tədarükü üçün müsabiqə elan edib. Təsnifat tələblərini yalnız Rusiyanın illər ərzində Ermənistana silah, güllə və optika satan "Promtexnologii" qrupunun bir hissəsi olan ORSIS şirkəti təmin edə bilib.

Tezliklə səbəb izah etmədən tenderi bağlayıblar. Avqustda ORSIS Ermənistandakı hüquqşünası vasitəsilə iddia qaldırıb.

Etiraz notası artıq XİN-ə daxil olub və yaxın günlərdə Ermənistan tərəfə təqdim ediləcək. Sənəd oktyabrın 22-də Rusiyanın sənaye-ticarət nazirinin müavini Oleq Ryazantsev tərəfindən imzalanıb və Ermənistanın müdafiə naziri David Tonoyana ünvanlanıb. Notada deyilir ki, ORSIS-in tenderdə iştirak ərizəsi "heç bir əsas olmadan qəbul edilməyib", şirkət özü isə "əsaslandırılmadan xoşagəlməz tədarükçülər siyahısına salınıb".

Həmçinin deyilir ki, Ermənistanın Müdafiə Nazirliyi "qanunsuz olaraq banka tenderdə iştirakla bağlı bank zəmanətinin ödənilməsi tələbi ilə müraciət edib", baxmayaraq ki, şirkət tenderi udsaydı və özü müqavilə imzalamaqdan imtina etsəydi belə bir təzminat ödəməli olardı.

"Sizdən yaranmış vəziyyəti araşdırmağınızı və vəziyyətin nizamlanmasına yönəlmiş tədbirlər görülməsi haqqında göstəriş verməyinizi xahiş edirəm", deyə Rusiya XİN-in müraciətində bildirilir. -02D-