Rusiyada ÜAK ləğv olunur

RF Ədliyyə Nazirliyi Ümumrusiya Azərbaycanlılar Konqresinin (ÜAK) ləğvi haqqında Ali Məhkəməyə müraciət edib. Bu barədə Azərbaycanın Diaspora ilə İş üzrə Dövlət Komitəsinin məlumatında deyilir.

"ÜAK-ın ləğvi haqqında Rusiya KİV-in yaydığı məlumat Azərbaycan ictimaiyyətinin və Rusiyada çoxsaylı Azərbaycan diasporasının ciddi narahatlığına səbəb olub", deyə bəyanatda bildirilir.

Komitə qeyd edir ki, 2001-ci ildə Heydər Əliyevin və RF prezidenti Vladimir Putinin dəstəyi ilə yaradılmış ÜAK Rusiyada yaşayan azərbaycanlılar arasında mədəni və mənəvi əlaqələrin qurulmasında, onların Rusiya ictimaiyyətinə inteqrasiyasında və iki ölkənin münasibətlərinin inkişafında böyük iş görüb.

ÜAK-ın fəaliyyəti "xalqların çoxəsrlik dostluq ənənələrinə əsaslanır, iki ölkə arasında strateji tərəfdaşlığın dərinləşməsinə xidmət edib".

ÜAK öz fəaliyyətini RF qanunları çərçivəsində həyata keçirir, dini və etnik tolerantlığın, millətlərarası dostluğun möhkəmlənməsinə, mədəniyyətlər arasında dialoqun dərinləşməsinə töhfə verirdi.

Rusiyanın milli və dövlət maraqları təşkilatın əsas və dəyişməz prioritetləri idi, deyə bəyanatda vurğulanır.

"Dünyada və regionda gedən mürəkkəb və ziddiyyətli proseslər fonunda ÜAK-ın fəaliyyətinin dayandırılması iki ölkənin maraqlarına xidmət etmir. ÜAK-ın ləğvi və ya bu qurumun nüfuzuna xələl gətirilməsinə yönəlmiş təşəbbüslər çoxəsrlik dostluq ənənələrinə, etimada, Azərbaycan və Rusiya arasında strateji tərəfdaşlıq əhval-ruhiyyəsinə ziddir və bu münasibətlərin inkişafında maraqlı olmayan qüvvələrin maraqlarına xidmət edə bilər", deyə sənəddə qeyd olunur.

Sonda RF-nin müvafiq qurumlarının hər iki ölkənin milli maraqlarına uyğun obyektiv və ədalətli qərar qəbul edəcəyinə ümid ifadə olunur. Hazırda ÜAK RF-nin 67 subyektində 73 regional təşkilata malikdir. –06D-