Rüstəm İbrahimbəyovun müraciətinə reaksiyalar

Aprelin 26-da Ziyalılar Forumunun həmsədri Rüstəm İbrahimbəyov Azərbaycanın siyasi partiya liderlərinə Demokratik Qüvvələrin Milli Şurasının yaradılması prosesini sürətləndirmək çağırışı ilə müraciət edib.

  “Demokratik Qüvvələrin Milli Şurasının yaradılması prosesinin ləngidilməsi bir çox versiyalar və proqnozlar yaradır. Bu birləşmə ideyasının tərəfdarlarının sayı, şübhəsiz ki, artır, amma partiya və hərəkat rəhbərləri arasında qarşılıqlı münasibətlərin çətinliyi ilə əlaqədar bu ideyanın həyata keçirilə biləcəyinə şübhə edənlərin fikri də diqqət çəkir”, - müraciətdə qeyd olunur. 

  R.İbrahimbəyovun özünün Milli Şuranın işində iştirakıma gəlincə,  o bildirir ki,  yalnız bir halda buna razılaşa bilər, ölkənin əsas demokratik qüvvələri qurumda kifayət qədər geniş təmsil edilsin və cəmiyyətin etibarını və hörmətini qazanmış şəxslər şuraya daxil olsun.

  Turan agentliyi  R.İbrahimbəyovun müraciətinə siyasi partiyaların münasibətini öyrənib.   

  “Açıq Cəmiyyət Partiyası və onun lideri Rəsul Quliyev Milli Şura ideyasının ilk müdafiə edənlərdəndir. ACP müxalifətin geniş koalisiyasını dəstəkləyir”. Bu barədə ACP sədri Sülhəddin Əkbər Turan-a bildirib. 

  S.Əkbərin fikrincə, bu ideyanın müzakirəsi zamanı səhvlərə yol verilib. “Milli Şura ideyası o zaman uğur qazana bilər ki, bu ideya öz ətrafında bütün demokratik qüvvələri birləşdirə bilsin. Amma Milli Şura ideyasının gerçəkləşməsi ilə bağlı danışıqlar prosesi və danışıqların məhdud dairədə aparılması düzgün deyildi. Doğrudur, sonradan danışılar prosesinə dəyişikliklər edildi. Amma təəssüf ki, sonradan yenidən üçlük formatına (El Hərəkatı, AXCP, Müsavat) qayıdıldı. Milli Şura yalnız geniş şəkildə aparılan müzakirələrdən sonra formalaşa bilər. Bunun üçün öncə müxalifətin geniş koalisiyasını qurmaq lazımdır. Milli Şuranı dar çərçivədə yaratmaq və digər qüvvələrin bura sonradan daxil olacağın iddia etmək yanlış yoldur”, -  o qeyd edib. 

  Partiya sədri bildirib ki, Milli Şura həm 1918-ci ildə, həm də 1991-ci ildə yaradılanda hüquqi legitimliyi olub, üzvlər deputatlar olub. “İndi yaradılacaq Milli Şuranın hüququ legitimliyi olmadığı üçün ictimai-siyasi legitimliyi çox önəmlidir. Bunun üçün 3 kriteriya əsas götürülməlidir. Müstəqillik dövründə demokratik düşərgədən seçilən və bu gün müxalifətdə olan sabiq deputatlar, demokratik düşərgədə təmsil olunan bütün müxalifət partiyalarının liderləri və demokratiyanı, insan hüquqlarını müdafiə edən ictimai xadimlər təmsil olunmalıdır”, - bildirib.

  Onun fikrincə, Milli Şura danışıqları açıq və geniş tərkibdə aparılmalıdır, aydın kriteriyalara söykənməlidir.   

  AXCP sədri Əli Kərimli bildirib ki, Milli Şuranın yaradılması ilə bağlı müzakirələrə may ayında yekun vurulacaq. "Biz fərqindəyik ki, ölkə əhalisinin əksər hissəsinin seçkiyə olan ümidi ölüb, insanlar seçkidə iştirakı önəmli saymırlar. Əgər biz birləşsək, yaxşı seçki kampaniyası aparsaq, insanların seçkidə aktiv iştirakını təmin edə bilərik".

  Ə.Kərimli birlik ideyasına şəxsi münasibətlər prizmasından yanaşmır. “Siyasətçi həmkarlarıma təklif edirəm ki, siyasi mülahizələri şəxsi münasibətlər kontekstində qiymətləndirməsinlər".

  AXCP sədri deyib ki, Milli Şura təkcə vahid namizədi müəyyənləşdirmək üçün yaranmır. "Milli Şura demokratik qüvvələrin konsolidasiya mərkəzidir. Biz ilkin prinsipləri müəyyənləşdirəndən sonra vahid namizəd məsələsini müzakirə etməyi düzgün sayırıq. Əgər bu zaman  real namizədlər ortaq məxrəcə gələ bilməsələr, cəmiyyətdə nüfuzu olan bir şəxs keçid dövrü üçün potensial namizəd ola bilər".

  Demokrat Partiyasının sədri Sərdar Cəlaloğlu Milli Şuranın bu şəkildə yaradılmasına müsbət yanaşmadığını deyib. O,  qurumun 2-3 partiyanın iştirakı yaradılmasına, bütün qalan demokratik spektrin bundan xəbərsiz qalmasına diqqəti çəkib. 

  S.Cəlaloğlu Müsavat Partiyasının başqanı İsa Qəmbərin bu qurumla “qırmızı cizgilər”ə qədər əməkdaşlıq edəcəyi haqda bəyanatını Milli Şuradan dövlətçiliyə təhlükə gələ bilməsi kimi dəyərləndirib. Vaxtilə Nəriman Nərimanovun nümunəsində Azərbaycanın belə təhlükə yaşadığını və sonunda dövlət müstəqilliyini itirildiyini yada salıb. “Odur ki, qurumun fəaliyyətinə optimist baxmıram”, - ADP sədri bildirib.

  Müsavat Partiyası başqanının müavini Gülağa Aslanlı partiyanın Milli Şuranın yaradılmasının əleyhinə olmadığını bəyan edib.-03B05-