Seçki kampaniyası hakimiyyətin qanunsuz müdaxiləsi fonunda keçir

Ölkədə hüuqiq və siyasi mühit səmərəli seçki kampaniyası keçirilməsi üçün şərait yaratmayıb. Bu barədə bugünki mətbuat konfransında Seçkilərin Monitorinqi və Demokratiyanın Tədrisi (SMDT) Mərkəzinin rəhbəri Anar Məmmədli bildirib. O, Könüllülərin Beynəlxalq Əməkdaşlıq İctimai Birliyi (KBƏİB) ilə birgə ikinci aralıq hesabatı təqdim edib.

Hesabat sentyabrın 16-dan oktyabrın 6-na qədər seçkiqabağı təşviqat mərhələsini əhatə edib.

Məmmədli qeyd edib ki, 2008 və 2010-cu illərdə SM-yə edilmiş düzəlişlər seçki kampaniyasının 60, təşviqat müddətinin isə 22 günə qədər azaldılmasına gətirib çıxarıb ki, bu da namizədlərin, partiyaların və müşahidəçilərin seçki prosesində iştirakını məhdudlaşdırıb.

Seçki kampaniyası dövründə “Tolışi sədo” qəzetinin redaktoru Hilal Məmmədov barəsində hökm çıxarılıb, jurnalist Pərviz Həşimli həbs edilib.

Kampaniya seçkilər haqqında məlumat yayılması üçün sosial şəbəkələrdən istifadə ilə səciyyələnib, lakin sosial media fəalları təzyiqə məruz qalıb.

Kampaniyaya gəlincə, o, qeyri-bərabər şəraitdə keçirilir. Belə ki, bir çox dairələrdə namizədlərin seçicilərlə görüşləri üçün əlverişsiz yerlər ayrılıb.

Bu zaman yerli hakimiyyət, polis, bələdiyyələr müxalifət namizədlərinin təşviqat tədbirlərinə müdaxilə edib. Dairələrin 34%-də vətəndaşların İlham Əliyevə dəstək tədbirlərində məcburi iştirakı qeydə alınıb.

Texniki təkmilləşdirmələrə baxmayaraq, seçici siyahılarında problemlər var. Siyahılarda ölmüş insanların adlarının qalması halları qeydə alınıb. Eyni zamanda, daxili mühacirət həyata keçirənlər, habelə əvvəlki seçkilərdə səs verməyənlər siyahılardan çıxarılıb.

MSK ekzit-poll keçirmək istəyən qurumlara qarşı ayrı-seçkilik nümayiş etdirib.

Müstəqil müşahidəçilərin qeydiyyatında problemlər var. Belə ki, SMDT-nin təlim keçdiyi 100 müşahidəçilərə akkreditasiya verilməyib, baxmayaraq ki, MSK 40 min müşahidəçinin qeydə alındığını bildirir. Lakin bu müşahidəçilərin əksəriyyəti yerli hakimiyyətin və dövlət orqanlarının nümayəndələridir.

2 mindən çox beynəlxalq müşahidəçinin əksəriyyətinin kimliyi də şübhə doğurur, belə ki, onlardan cəmi 400 nəfəri ciddi beynəlxalq təşkilatları – ATƏT DTİHB, ATƏT PA, Avropa Parlamenti və AŞPA-nı təmsil edir.

Məmmədli həmçinin bildirib ki, İ.Əliyev, Cəmil Həsənli və İqbal Ağazadənin xeyrinə fəal seçki kampaniyası həyata keçirilib. Digər namizədlərin əksəriyyəti isə “texniki” namizəd olub və faktiki olaraq, hakimiyyətin namizədinin xeyrinə təşviqat aparıb.

İctimai Televiziyada teledebatların mahiyyəti və vaxtı da seçicilərin tələbatına cavab verməyib. 24 ümummilli və regional telekanaldan yalnız İTV namizədlərə efir verib. Bu zaman İTV C.Həsənliyə ödənişli efir vaxtı ayırmaqdan imtina edib.

MSK Cəmil Həsənliyə debatlardakı insidentə görə ciddi xəbərdarlıq, Hafiz Hacıyevə isə sadəcə xəbərdarlıq etməklə qeyri-obyektivlik nümayiş etdirib.

Ümumiyyətlə, Məmmədlinin fikrinci, ölkədə siyasi və hüquqi iqlim 9 oktyabr səsverməsinin azad, ədalətli və demokratik olacağı ilə bağlı böyük şübhələr doğurur.

KBƏİB rəhbəri Elnur Məmmədli bildirib ki, səsvermə günü bu koalisiyanın müşahidəçiləri bütün bölgələrdə məntəqələrin 15%-də monitorinq keçirəcək.

Bu QHT-lərin tövsiyələrində seçici siyahılarının maneəsiz dəqiqləşdirilməsi üçün şərait yaradılması, seçicilərə, müşahidəçilərə və namizədlərin nümayəndələrinə qarşı təzyiqlərə son qoyulması zərurətindən bəhs edilir. Hakimiyyət seçki komissiyalarının işinə qarışmamalıdır. -06B-