S.Əkbər: R.İbrahimbəyovun qeydiyyata alınmaması seçki olmadığı demək olacaq (YENİLƏNİB)

Milli Şuranın bu gün “Açıq Cəmiyyət” Partiyasının qərargah mənzilində keçirilən sessiyasında bir sıra komitələrin tərkibi formalaşdırılıb.

Bu barədə jurnalistlər üçün brifinqdə ACP sədri Sülhəddin Əkbər bildirib.

İqtisadi komitəyə Qubad İbadoğlu, sosial komitəyə Eldar Əliyev (Liberal Partiyanın üzvü), hüquq komitəsinə Vidadi Mirkamal, beynəlxalq münasibətlər komitəsinə Gültəkin Hacıbəyli, ictimaiyyətlə əlaqələr komitəsinə Mehman Əliyev, etika komitəsinə Nurəddin Mustafayev, Qarabağ komitəsinə Cəmil Həsənli rəhbərlik edəcək.

Eyni zamanda, hələlik mitinqlər və kütləvi tədbirlər, qadınların və gənclərin işləri üzrə komitələr formalaşdırılmayıb. Bu məsələlər üzrə müzakirələr davam edir.

Sessiyanın gündəliyindəki ikinci məsələ DQMŞ-dən vahid namizəd olan Rüstəm İbrahimbəyovun seçki qərargahının formalaşdırılmasıdır. Əkbərin sözlərinə görə, çox güman ki, qərargaha DQMŞ aparat rəhbəri Eldar Namazov rəhbərlik edəcək.

Hakimiyyətin İbrahimbəyovun namizədliyini qeydə almayacağı təqdirdə ehtiyat namizədin irəli sürülməsi mümkünlüyünə baxılıb-baxılmaması haqqında suala cavabda Əkbər deyib: “Milli Şuranın vahid namizədi var. Onun qeydiyyata alınmaması seçki olmadığı demək olacaq”.

DQMŞ nümayəndə heyətinin ABŞ-a səfərinə gəlincə, Əkbər deyib ki, bu struktur dəvət almayıb. Lakin DQMŞ-nin ayrı-ayrı üzvləri iyulun 16-da Helsinki Komissiyasında dinləmələrə dəvət edilib.

Sessiya davam edir. -03C06- 

2013 İyul 09 (Çərşənbə axşamı) 13:06:33

Bu gün Demokratik Qüvvələrin Milli Şurasının (DQMŞ) 3-cü sessiyası keçirilib. Milli Şuranın icra aparatının mətbuat xidmətindən verilən məlumata görə, sessiyanın gündəliyinə komissiya yaradılması, yeni üzvlərin qəbulu üzrə prosedur qaydalarının müəyyən edilməsi məsələləri var.

Bununla yanaşı, vahid namizədin seçki qərargahının yaradılması məsələsi də müzakirə olunacaq.

Sessiyanın nəticələri sessiyanın yekunlaşması üzrə brifinqdə elan ediləcək. -16D04-