Strasburqda Sərsəng su anbarı məsələsi müzakirə olunur

Cümə axşamı AŞPA Sosial Siyasət Komitəsində Sərsəng su anbarı məsələsinin müzakirəsi zamanı məruzəçi Milisa Markoviçlə erməni deputatlar arasında qalmaqal yaranıb.

M.Markoviç Ermənistanı və Dağlıq Qarabağı məruzə hazırlamaq üçün səfərinə əngəl törədlməsində ittiham edib. “Əgər belə davam edərsə və mən oktyabrın 31-dək Ermənistana və Dağlıq Qarabağa səfər edə bilməsəm məruzəmi səfər etmədən hazırlayacam”, - o bildirib.

Buna cavab olaraq erməni deputat Vaqan Babayan deyib ki, Ermənistan məruzəçinin səfərindən imtina etməyib. “Biz yalnız bildirmişik ki, səfəri bu ilin noyabrında təşkil edəcəyik. Markoviçin indiyədək Sərsəng su anbarında ola bilməməsi məruzəçinin Dağlıq Qarabağa getmək üçün DQR hakimiyyətinə müraciət etmək istəməməsilə əlaqədardır”, - o bildirib.

Lakin Markoviç deyib ki, Dağlıq Qarabağ tanınmamış respublikadır və o müraciət etməyəcək.

Sərsəng problemi  üzrə məruzəçi 2014-cü ildə Azərbaycanın təkidilə təyin edilib. Məqsəd bu obyektin istifadəsinin araşdırılmasıdır.

Qeyd edək ki, Sərsəng su anbarı 80-ci illərin əvvəlində Dağlıq Qarabağın Mardakert rayonu ərazisində Qarabağın aran rayonlarını suvarmaq üçün tikilib. Su anbarının tam həcmi 560 mln. m3, faydalı həcmi 500 mln. m3, istifadəsiz həcmi 60 mln. m3-dir. Su anbarının uzunluğu normal doldurulduqda 11,75 km., eni 1,75 km., suyun dərinliyi normal səviyyədə 103 m.-dir.

Bəndin hündürlüyü  125 m.-dir. Həmçinin su anbarında 50 MVt gücündə SES yerləşir. Sovet dövründə Sərsəngdən Azərbaycan istifadə edib. Lakin Qarabağ münaqişəsindən  sonra erməni tərəfi suvarma zamanı Azərbaycana su verməməyə başladı. Eyni zamanda bəzən ermənilər  xəbərdarlıq etmədən böyük həcmdə su buraxırlar ki, bu da ərazilərin su altında qalmasına səbəb olur.-02D-