Syunik Paşinyanı etiraz aksiyası ilə “qarşılayır”

Bakı/21.12.20/Turan: Dekabrın 21-də səhər saatlarında Ermənistanın Syunik vilayətinin sakinləri və Polis Qoşunları arasında qarşıdurma baş verib. Gecə saatlarından etibarən Daxili Qoşunların 2000-ə yaxın qulluqçusu bölgəyə göndərilib. Vətəndaşlar baş nazir Nikol Paşinyanı öz vilayətlərinə buraxmayacaqlarıını bəyan etmişdilər.

Bir müddət əvvəl Qoris meri Aruş Aruşanyan sakinləri Paşinyanın Syunik vilayətinə girişini qadağan etməyə çağırıb, bundan sonra o, saxlanılıb.

Öz növbəsində, yerli polis dekabrın 21-də Qoris merini saxlamaqdan imtina edib və Yerevandan xüsusi qüvvə göndərilib, bu barədə Ermənistan KİV-ləri məlumat yayıb.

Qorisə gedərkən yolda Nikol Paşinyan Facebook-da canlı yayımda bölgə sakinlərinə müraciət edib. “Syunikə bölkə sakinlərinə hörmətimi izhar etmək, onlarla açıq şəkildə danışmaq üçün gəlirəm. Sizi inandırıram ki, Syuniklilərlə söhbət zamanı gözlərimi qaçırmayacağam. Sizin qarşınızdakı öhdəliklərimi tam həcmdə yerinə yetirmişəm və yetirirəm”, deyən Paşinyan sualları cavablandırmağa və “gözlərinizin içinə baxa-baxa” izahat verməyə hazır olduğunu vurğulayıb.

Xatırladaq ki, bölgə sakinlərinin narazılığına Syunik vilayətinə bitişik Azərbaycan ərazilərinin – Zəngilan və Qubadlının azad edilməsi səbəb olub.

Yerli ermənilər və Yerevan müxalifəti bunu Paşinyan tərəfindən satqınlıq kimi qiymətləndirib. -02D-