Tatarıstan Azərbaycanı Volqa-Xəzər hövzəsinin nəqliyyat imkanlarından daha fəal şəkildə istifadə etməyə çağırıb

Bakı/29.11.22/Turan: Prezident İlham Əliyev çərşənbə axşamı Bakıda Tatarıstan prezidenti Rüstəm Minnixanovun başçılıq etdiyi nümayəndə heyətini qəbul edib.

Tatarıstan prezidentinin saytında yer alan məlumata görə, Minnixanov qeyd edib ki, iki ölkə arasında ticari-iqtisadi, elmi-texniki və mədəniyyət sahəsində əməkdaşlıq haqqında saziş mövcuddur. Bundan başqa, hökumətlərarası komissiya yaradılıb. "Biz Volqa-Xəzər hövzəsinin nəqliyyat və logistika imkanlarından daha fəal istifadə etməliyik", deyən prezident energetika və sənaye, avtomobil istehsalı, neft-kimya, qaz-mühərrik yanacağı kimi perspektivli istiqamətləri qeyd edib.

Minnixanov həmçinin Əliyevə RF prezidentinin tapşırığı ilə "Rusiya - İslam dünyası" Strateji Baxış Qrupuna rəhbərlik etdiyi barədə məlumat verib və Azərbaycan nümayəndəsini Qrupun işində iştiraka dəvət edib.

Bundan başqa, o, Azərbaycan nümayəndə heyətini "Rusiya - İslam Dünyası: KazaSummit" beynəlxalq iqtisadi sammitində iştiraka dəvət edib.

Əliyev, öz növbəsində, Tatarıstan nümayəndə heyətinə Azərbaycana səfəri çərçivəsində yaxşı və məhsuldar iş arzulayıb.

Azərbaycan tərəfi hələlik Əliyevin Minnixanovla görüşü haqqında qısa məlumat yerləşdirib.

Minnixanov 28-29 noyabr tarixlərində Bakıda səfərdədir. Səfər proqramına rəsmi danışıqlarla yanaşı, Azərbaycanın tatar ictimai təşkilatları ilə ünsiyyət, Azərbaycanda tatarların tarixinə dair sərgiyə baş çəkilməsi də daxildir. 06D