Tələbələrin yataqxana ilə təmin olunması məsələsini necə həll etməli?

Bakı/30.09.19/Turan: Sentyabrın 30-da Milli Məclisin payız sessiyasının ilk iclasında deputatlar tələbə yataqxanaları məsələsinə toxunublar.

Deputat Qənirə Paşayeva "Təhsil krediti haqqında" qanunun qəbulunun vacibliyini bildirib. Bu, tələbələrin yataqxana ilə təmin olunması məsələsini həll edərdi.

Ekspert Kamran Əsədov bu təklifi Turan-a şərh edərkən deyib ki, tələbələri mənzil icarəyə götürmək üçün kredit ilə yox, yataqxana ilə təmin etmək lazımdır.

Azərbaycanda 51 universitet var və 164 min tələbə təhsil alır. Universitetlərin 31-i Bakıdadır. Ancaq 7 universitetin yataqxanası var.

Ekspert müqayisə üçün deyib ki, Türkiyədə 210 ali məktəbin 710 yataqxanası var.

O hesab edir ki, universitetlər kreditlərin hesabına yaxınlıqdakı yeni tikilən binalarda mənzil alıb tələbələrə aşağı qiymətə - ayda 40-50 manata verə bilər və bu vəsait hesabına krediti ödəyə bilər.

Azərbaycan universitetlərinin dünya reytinqlərində olmamasının əsas səbəblərindən biri yataqxanaların olmamasıdır.

İctimai fəal və ekspert Bəxtiyar Hacıyev qeyd edib ki, inkişaf etmiş ölkələrdə universitetlərin öz kampusları var və tələbələr müəyyən ödəniş etməklə orada yaşayırlar.

Əgər tələbə təhsil və yaşayış haqqını ödəməkdə çətinlik çəkirsə, ona 20 illiyə uzunmüddətli kredit verilir. Kreditlərin ödənilməsinə ali məktəbi bitirdikdən iki il sonra başlanılır.

Qeyd edək ki, Azərbaycanın bəzi ali məktəblərinin yataqxanalarında hələ də məcburi köçkünlər məskunlaşıblar.06D-