![Tonoyan Ermənistanın işğalçı dövlət olduğunu təsdiqlədi](https://turan.az/resized/750/500/resize/media/2019/main/061000019524.jpg)
Tonoyan Ermənistanın işğalçı dövlət olduğunu təsdiqlədi
Bakı/10.06.09/Turan: Ermənistan müdafiə nazirinin Azərbaycan hərbi qulluqçusunu məhv edən şəxsləri mükafatlandırması Azərbaycan ərazilərinin həmin dövlət tərəfindən işğalına daha bir sübutdur. Azərbaycan XİN mətbuat xidmətinin nümayəndəsi azərbaycanlı hərbçinin məhv edilməsi və bunda iştirak edən şəxslərin mükafatlandırılması ilə bağlı Ermənistan müdafiə nazirinin "cəza əməliyyatı"nın həyata keçirilməsi barədə bəyanatını şərh edərkən bildirib.
"Fikrimizcə, düşmən qüvvələrin düşərgəsində kim kimi idarə edir məsələsində böyük qarışıqlıq mövcuddur. Aydındır ki, Ermənistan rəhbərliyi yalan bəyanatlar verməklə məsuliyyətdən yayınmağa çalışır. Bu ölkənin müdafiə naziri isə Azərbaycan hərbi qulluqçusunu məhv etmək əmrini yerinə yetirənləri şəxsən mükafatlandırmaqla Ermənistanın işğalçı dövlət olduğunu etiraf etmiş olur. Bu, Ermənistan silahlı qüvvələrinin Azərbaycan ərazilərinin işğalında bilavasitə iştirak etdiyinin bariz sübutudur", - Azərbaycan XİN mətbuat xidmətinin nümayəndəsi bildirib.
Ermənistan müdafiə nazirinin bu hərəkəti, həmçinin bu ölkənin beynəlxalq vasitəçiləri aldatdığını və onlara hörmətsizlik etdiyini açıq şəkildə nümayiş etdirir. "Xatırladırıq ki, ATƏT-in Minsk Qrupunun həmsədrlərinin bölgəyə səfəri zamanı Ermənistan Silahlı Qüvvələri snayper atəşi ilə qanlı təxribat törədib və bölgə səfəri ilə bağlı həmsədrlərin bəyanatından bir-neçə gün sonra Ermənistan yenidən qanlı cinayətə əl atıb. Təəssüflə qeyd etmək istərdik ki, məhz Ermənistanın məsuliyyətsiz davranışı nəticəsində bölgə yüksələn gərginlik astanasındadır. Ermənistanda müharibə tərəfdarlarının törətdiyi bu təxribatlar münaqişənin həlli üzrə aparılan danışıqların mahiyyətinə zərbə vurmaq cəhdidir. Bir daha vurğulayırıq ki, hadisələrin bu istiqamətdə inkişafının bütün məsuliyyəti Ermənistan tərəfinin üzərinə düşür", - Azərbaycan XİN-in nümayəndəsi bildirib.
Mayın 30-da Qarabağ münaqişə zonasında azərbaycanlı hərbçi Aqil Ömərov həlak olub.
İyunun 1-də erməni tərəfi əsgər Sipan Melkonyanın həlak olduğunu bildirib.
İyunun 9-da cəbhənin Tərtər rayonu istiqamətində erməni tərəfin açdığı atəş nəticəsində Azərbaycan ordsunun hərbçisi Elşən Vüqar oğlu Xəlilov həlak olub.-06D-
Siyasət
-
İyulun 26-da “III Respublika Platforması” bəyanat yayaraq, bu qurumun həbsdə olan rəhbəri Akif Qurbanovun azyaşlı uşaqlarının elektron cihazlarının qanunsuz ələ keçirilməsinə diqqət çəkiblər.
-
İyulun 19-dan iyulun 26-dək Xankəndidə 24 avtomat, 1 pulemyot, 9 tüfəng, 28 qumbara, 441 mərmi, 3118 müxtəlif çaplı patron və digər döyüş sursatları aşkar edilib, bu barədə Daxili İşlər Nazirliyi məlumat yayıb.
-
Prezident İlham Əliyev fərmanla müdafiə sahəsində hərbi kəşfiyyat sahəsində əməkdaşlıq haqqında Azərbaycan-Qazaxıstan hökumətlərarası sazişi təsdiq edib.
-
Bakı Ağır Cinayətlər Məhkəməsində müxalif siyasətçi Tofiq Yaqublunun məhkəməsində digər təqsirləndirilən Elnur Vaqıfoğlunun ifadəsi dinlənilib.
Rəy yaz