Türkmənistan XİN Moskvaya xitabən: Bakı ilə aramızı vurmağa çalışmayın

Türkmənistanın Xarici İşlər Nazirliyi Rusiya KİV-lərini Aşqabadla Bakının arasını vurmaq cəhdində ittiham edib.

Son vaxtlar bəzi Rusiya KİV-lərində Xəzərdə böhranlı vəziyyət yaranması ehtimalı ilə bağlı həddindən artıq şişirdilmiş mülahizələr yer alan məlumatlar yayılır, deyə Türkmənistan XİN-in sentyabrın 20-də yaydığı press-relizdə qeyd edilir.

Xüsusən, “REGNUM” agentliyinin Türkmənistan-Azərbaycan münasibətlərini mənfi cəhətdən təqdim etməyə çalışan Rusiya Elmlər Akademiyasının Şərqşünaslıq İnstitutunun əməkdaşı Stanislav Pritçinin Aktauda konfransdakı çıxışını yaydığı xatırladılır. 

“Türkmənistan tərəfi qeyd edir ki, bu çıxışda yer almış Xəzərdə Türkmənistan və Azərbaycan arasında vəziyyətlə bağlı ifadələr həqiqətə qətiyyən uyğun deyil. İki ölkə arasında əməkdaşlıq qarşılıqlı hörmət və konstruktiv dialoq prinsipləri əsasında inkişaf edir və iki qardaş xalqın ənənəvi dostluq və yaxşı qonşuluq bağlarına əsaslanır.

Bu zaman Xəzər üzrə danışıqlar prosesinin fəal iştirakçısı olan Türkmənistan ilk gündən bütün məsələlərə yalnız hüquqi müstəvidə və diplomatik metodlar vasitəsilə baxılmasının tərəfdarıdır”, deyə məlumatda bildirilir.

Qeyd edək ki, yuxarıda adı çəkilən ekspert Bakı və Aşxabad arasında fikir ayrılıqlarının antaqonist xarakterli olduğunu və Xəzərdə dəniz yataqları ilə bağlı mübahisənin iki ölkə arasında silahlı qarşıdurmaya gətirib çıxara biləcəyini iddia edirdi. -02D-