Türkmənistan XİN rəhbərinin səfərinin arxasında nə durur? (YENİLƏNİB)

Çərşənbə günü Bakıda Azərbaycan və Türkmənistan XİN rəhbərləri – Elmar Məmmədyarov və Raşid Meredovun görüşü keçirilib.

XİN-in mətbuat xidmətinin məlumatında deyilir ki, tərəflər ikitərəfli əlaqələrin hazırki səviyyəsindən məmnunluq ifadə ediblər və siyasi, iqtisadi, ticarət, mədəniyyət və humanitar sahələrdə münasibətlərin daha da inkişaf etdirilməsi, habelə beynəlxalq təşkilatlarda qarşılıqlı əlaqələrin gücləndirilməsi məsələlərini müzakirə ediblər.

Qarşılıqlı maraq doğuran bir sıra digər məsələlər üzrə fikir mübadiləsi aparılıb.

Meredov Bakıda ikigünlük rəsmi səfərdədir.

Qeyd edək ki, XİN təcrübəsində yaranmış təcrübəyə əsasən, Məmmədyarovun xarici həmkarları ilə danışıqlarından sonra mətbuat konfransı keçirilir. Lakin bu gün belə bir konfrans keçirilmədi.

Meredovun səfərini, şübhəsiz, mühüm hadisə hesab etmək lazımdır, belə ki, son 5 ildə belə yüksək səviyyədə ikitərəfli əlaqələr olmayıb.

Bundan başqa, Türkmənistan tərəfi dəfələrlə Azərbaycanı Xəzərdə mübahisəli neft və qaz yataqları ilə əlaqədar beynəlxalq məhkəməyə verməklə hədələyib.

İkitərəfli münasibətlərdə hazırki yaxınlaşma tərəflərin Transxəzər qaz kəməri layihəsini həyata keçirmək cəhdlərinə dəlalət edə bilər.

Qərbin Rusiya ilə münasibətlərindəki böhran və Aİ-nin RF-dən enerji asılılığını azaltmaq niyyəti fonunda bu layihənin aktuallığı kəskin şəkildə artır.

Aşqabadın bu layihəyə qoşulması Türkmənistan qazının böyük Avropa bazarına çıxışı üçün yol açacaq. -06D-

2014 Aprel 02 (Çərşənbə) 14:58:07

Türkmənistan xarici işlər naziri Raşid Meredov aprelin 2-də Bakıya rəsmi səfərə gəlib.

Türkmənistanın Azərbaycandakı səfirliyindən Turan-a verilən məlumata görə, səfər iki gün davam edəcək. Səfər zamanı Azərbaycan rəhbərliyi ilə görüşlər və danışıqlar baş tutacaq. -02D-