XİN: Lüksemburq parlamentinin Qarabağa dair bəyanatı qərəzlidir

Bakı/26.12.20/Turan: Azərbaycan Xarici İşlər Nazirliyi 2020 –ci il dekabrın 24-də Lüksemburq Böyük Hersoqluğunun Deputatlar Palatasının Dağlıq Qarabağla bağlı qəbul etdiyi qətnaməni pisləyib. 

XİN-in bəyanatında deyilir ki, parlamentin Xristian-Sosialist Siyasi Partiyasının ermənipərəst üzvü Klod Viseler tərəfindən irəli sürülən bu qətnamədə bölgədəki vəziyyətlə bağlı həqiqətlər təhrif olunur, Azərbaycan və Türkiyəyə qarşı tamamilə əsassız ittihamlar irəli sürülür.

Qətnamənin hər hansı hüquqi qüvvəsinin olmamasına rəğmən, Lüksemburq parlamentinin beynəlxalq hüquqa və BMT Təhlükəsizlik Şurasının qətnamələrinə zidd olan sənədlərlə çıxış etməsi, bölgədəki vəziyyəti öyrənmədən yanlış ittihamlar irəli sürməsi bu qurumun qərəzli mövqeyindən xəbər verir.

Əgər Lüksemburq qanunverici qurumunun üzvləri bölgənin, o cümlədən Ermənistanın gələcəyini düşünsəydilər, o zaman 10 noyabr tarixli üçtərəfli bəyanatın icrasını, bölgədə sülh, təhlükəsizik və rifahın yaradılması üçün yeni əməkdaşlıq imkanlarından faydalanmaq fikirlərini təşviq edərdilər. Görünən isə odur ki, Lüksemburq parlamenti bölgədəki uzunmüddətli münaqişənin həlli, BMT TŞ qətnamələrinin həyata keçirilməsi, onilliklərdir fundamental hüquqları pozulan məcburi köçkünlərin hüquqlarının bərpa olunması ilə yaranmış yeni vəziyyətdə yox, bölgə dövlətləri arasında ədavətin alovlandırılmasında maraqlıdır.

“Vurğulamaq istərdik ki, bu kimi təxribat xarakterli və qərəzli sənədlərin qəbulu bölgənin beynəlxalq hüquq prinsiplərinə hörmət əsasında gələcək inkişafı və tərəqqisinə maneə ola bilməyəcək”, - XİN-in bəyanatında deyilir.

Lüksemburq parlamenti öz qətnaməsində ölkə hakimiyyətini Dağlıq Qarabağın yekun statusuna aparan siyasi prosesə təşəbbüs göstərməyə, "kasset silahlarından istifadə daxil olmaqla, mülki infrastruktura hücumlara dair sənədləşdirilmiş hərbi cinayətlərin müstəqil araşdırılmasına" tərəfdar olmağa, "erməni monastrlarının, kilsələrin və abidələrin müdafiəsinə zəmanət verməyə" çağırıb.06D-