Xorvatiya hökumətinə sual: Azərbaycandakı korrupsiya Xorvatiyada da təkrarlanmayacaq ki?

Prezident İlham Əliyevin Xorvatiyaya səfəri yerli hökumətə qarşı sərt ittihamlara səbəb olub. 

İ.Əliyevin səfərilə əlaqədar Adriatik Institutu Xorvatiyanın baş naziri Zoran Milanoviç və xarici işlər naziri Vesna Pusikə açıq məktub ünvanlayıb. Məktub müəllifləri baş nazir və xarici işlər nazirindən İ.Əliyevlə bağlı bir sıra kəskin suallara cavab istəyirlər.

“Bizi dəhşətə gətirən odur ki, Azərbaycan prezidenti Ilham Əliyev Xorvatiyada yüksək səviyyədə qarşılanıb. Xorvatiya vətəndaşları və bu ölkənin vergi ödəyicilərinin mənafeyi naminə bu məsələ ilə bağlı verəcəyimiz suallar var”, - deyə məktubun hansı zərurətdən göndərildiyi əsaslandırılır.

İnstitut Xorvatiya hökumətindən aşağıdakı suallarına cavab tələb edir:

- Avropa Ittifaqının digər üzv dövlətləri bu avtoritar dövlət başçısını öz ölkələrində görmək istəmədikləri halda, necə olur ki, Ilham Əliyev Xorvatiyaya gəlir? Avropa Ittifaqı və qanunun aliliyinə hörmət edən digər ölkələr müxalifətçiləri həbsxanaya göndərən Bakıdakı diktatura rejimini pislədiyi bir vaxtda, Ilham Əliyevin Xorvatiyada qəbul edilməsi onlara qarşı çıxmaq deyilmi?

- Əliyevlə görüşmək üçün konkret səbəb vardımı? Bu görüş Xorvatiya prezidentinin rolu deyilmi? Əliyev sizinlə görüşmək üçün öz ölkəsinin baş nazirini gətirə bilməzdi? Siz bilmirsinizmi ki, Azərbaycanda hökumət Ilham Əliyev və onun ailəsinə xidmət edir?

- Azərbaycanın avtoritar lideri Ilham Əliyev ölkəsinə, xüsusən də atasına diqqəti cəlb eləmək üçün böyük pullar xərcləyir, külli miqdarda vəsait hesabına xarici ölkələrdə onun heykəllərini ucaltdırır. Məsələn, Meksikada və Serbiyada olduğu kimi. Siz Əliyevin atasının heykəlini ucaltmaqla ondan pul almaq istəyirsinizsə, bu halda, yerli və beynəlxalq qəzəblə qarşılaşmağa hazırsınız?

- Əliyev deyir ki, o, turizmin inkişafında maraqlıdır. Heç kimə sirr deyil ki, Azərbaycan dəniz kənarında yerləşən daşınmaz əmlakı almaq istəyir və bu sahədə Rusiya investoru ilə rəqabətə girib. Xorvatiya Adriatik dənizi sahilində Azərbaycanın əyaləti olacaq?

- Siz Ilham Əliyevlə bu şəkildə əməkdaşlıq etmək üçün Avropa Ittifaqındakı həmkarlarınızla məsləhətləşmisiniz? Sizin kommersiya razılaşmalarınız nə dərəcədə açıq olacaq? Ilham Əliyev bu tipli məlumatların yayılmasına razılıq verib?

- Siz özünüzü tamamilə Şimali Koreya lideri Kim Çen Unu xatırladan bir şəxslə görüşdə necə hiss edirsiniz? Lakin kasıb Şimali Koreyadan fərqli olaraq, bu ölkə neft və qazla zəngindir və burada da ailə diktaturası mövcuddur. Sizin Əliyevlə söz və mətbuat azadlığının boğulması məsələlərinə dair razılaşmanız var?

- Əliyevin fəaliyyəti korrupsiya mövzusunda dərslik sayıla bilər. Bu ölkədə orta aylıq əməkhaqqı 400 dollardır, prezident və onun ailəsi isə milyardlara sahibdir. Bu barədə Amerikanın CNBC kanalının araşdırma materialından xəbəriniz var?

- İlham Əliyevin Xorvatiyaya səfəri zamanı siz hansı dərsi götürmüsünüz və bunun nəticəsində Azərbaycandakı korrupsiya Xorvatiyada da təkrarlanmayacaq ki?-03D-