Yaponiya baş nazirinin müşaviri Bakıda ikitərəfli əməkdaşlıq məsələlərini müzakirə edib

Bakı/09.03.18/Turan: İlham Əliyevin Yaponiya baş nazirinin xarici siyasət məsələləri üzrə müşaviri Tomoxiko Taniquçi ilə görüşündə Azərbaycan-Yaponiya münasibətlərinin inkişafı məsələləri müzakirə olunub.

Yaponiya islam dünyasında sabitlik, təhlükəsizlik və qarşılıqlı anlaşmada Azərbaycanın roluna xüsusi əhəmiyyət verir, deyə Tomoxiko Taniquçi bildirib.

İlham Əliyev Yaponiyanın bank sektorunun Azərbaycanda infrastrukturun müasirləşdirilməsi işinə yardımının əhəmiyyətini qeyd edib.

Tərəflər Azərbaycanda infrastruktur layihələrinin həyata keçirilməsi, bank sektorunda əməkdaşlıq, iqtisadiyyatın şaxələndirilməsi, kənd təsərrüfatı və s. haqqında fikir mübadiləsi aparıblar.

Elə bu gün birinci vitse-prezident Mehriban Əliyeva Taniquçini qəbul edib. Rəsmi məlumata əsasən, energetika sahəsində, humanitar sahədə və mədəniyyət sahəsində əməkdaşlıq məsələləri müzakirə olunub. -02D-