Zatulinin davranışı rəsmi Moskvanın mövqeyilə uzlaşmır

Bakı/14.10.19/Turan: Azərbaycan XİN RF Dövlət Dumasının deputatı Konstantin Zatulinin işğal olunmuş ərazilərə səfərini və Xankəndidə "forum"da iştrakına münasibət bildirib.

"Rusiya Dövlət Dumasının MDB, Avrasiya inteqrasiya məsələləri və həmvətənlərlə əlaqələr Komitəsinin sədrinin müavini, qatı ermənipərəst mövqeyi ilə tanınan Konstantin sözügedən "forum"da qanunsuz iştirakı onun Azərbaycan əleyhinə yönəlmiş növbəti təxribatıdır", - Azərbaycan XİN rəsmi nümayəndəsi Leyla Abdullayeva bildirib.

O xatırladıb ki, K.Zatulin Azərbaycanın işğal edilmiş ərazilərinə səfərlər etdiyi üçün adı XİN-in müvafiq "qara siyahısı"na daxil edilib. K.Zatulinin "forum"da qanunsuz iştirakı və onun Azərbaycan əleyhinə təbliğat xarakteri daşıyan əsassız fikirləri rəsmi Rusiyanın mövqeyi ilə tamamilə uzlaşmır.

Azərbaycan və Rusiya arasında strateji xarakterli tərəfdaşlıq münasibətləri hər iki ölkə prezidentlərinin sıx təmasları ilə intensiv şəkildə inkişaf etməkdədir. Azərbaycan prezidenti İlham Əliyevin bu yaxınlarda "Valday" beynəlxalq diskussiya klubunda iştirakı və bu çərçivədə keçirilmiş ikitərəfli görüş bunun bariz nümunəsidir.

İki ölkə arasında uğurla inkişaf edən əməkdaşlıq fonunda K.Zatulin kimi şəxslərin fəaliyyəti Azərbaycan və Rusiya münasibətlərinə xələl gətirmək məqsədi güdür. Lakin bu kimi təxribat xarakterli səylərə baxmayaraq, Azərbaycan və Rusiya münasibətləri bundan sonra da uğurla inkişaf edəcək", - L.Abdullayeva bildirib.-06D--