"Zəngəzur dəhlizi" eksterritoriallıq nəzərdə tutmur - Toyvo Klaar

Bakı/20.11.23/Turan: Aİ-nin Cənubi Qafqaz üzrə xüsusi nümayəndəsi Toyvo Klaar "Zəngəzur dəhlizi" termininin, erməni tərəfin təqdim etdiyi kimi, eksterritoriallıq nəzərdə tutmadığını hesab edir. O, "Armenpress" agentliyinə müsahibəsində xatırladıb ki, 2023-cü ilin mayında prezident Əliyev Moskvada Paşinyan və Putinlə görüşdə dəhlizin eksterritoriallıq nəzərdə tutmadığını deyib. Söhbət nəqliyyat dəhlizindən gedir. Avropada da nəqliyyat dəhlizləri var və onlar da eksterritoriallıq nəzərdə tutmur, deyə Klaar qeyd edib.

 Aydındır ki, Ermənistan ərazisindən keçən istənilən yola Yerevan, Azərbaycan ərazisindən keçən yola isə Bakı nəzarət edir. "Bu halda Azərbaycan Ermənistan ərazisindən keçən Azərbaycan vətəndaşlarının və yüklərinin təhlükəsizliyinə zəmanət əldə etmək istəyir. Bu, tamamilə məntiqli və normaldır. Əməldə bu necə olacaq - buna görə Ermənistan hakimiyyəti cavabdehdir", deyə Klaar bildirib.

O, həmçinin Ermənistanın təklif etdiyi "Sülh qovşağı" ideyasını müsbət qiymətləndirib. "Bizim dinc Cənubi Qafqaz baxışımız bu nəqliyyat əlaqələrinin yenidən açılmasından, ticarət, sərhədləri keçən insanlar olmasından ibarətdir", deyə o qeyd edib.

Qarabağ qaçqınlarına toxunan Klaar onların geri qayıtmasının və onların təhlükəsizliyi üçün şərait yaradılmasının vacib olduğunu deyib. "Amma, əlbəttə ki, insanlar bunu istəmirsə, heç kimi qayıtmağa məcbur etmək olmaz. Lakin qayıtmaq istəyənlər varsa, bu insanların əksəriyyətinin qayıtmaq qərarı qəbul etməsinə imkan verəcək şərtləri təmin etmək üçün maksimum səy göstərilməlidir", deyə Klaar vurğulayıb.

Sülh müqaviləsinə toxunan Aİ-nin xüsusi nümayəndəsi bildirib ki, yekun sülh sazişinin bağlanması və onun şərtlərinin yerinə yetirilməsi vacibdir. "Mənim üçün sərhəd boyunca silahlı qüvvələr arasında məsafənin, sərhəd boyunca sakinlərə veriləcək real təhlükəsizlik hissinin və daha geniş miqyasda təhlükəsizliyin təmin edilməsi də çox vacibdir".

"Bütün maraqlı tərəflər üçün, əlbəttə ki, ritorika da vacib olacaq. 30 ildən çox davam edən münaqişədən sonra söhbət təkcə Azərbaycanın deyil, həm də Ermənistanın ritorikasından gedir. Müxtəlif aktorların müxtəlif kontekstlərdə bəyanatları olub. Ermənistan və Azərbaycan əhalisinin hazırda həqiqətən də fərqli dünyada, Cənubi Qafqazın həqiqətən qovşaq, sülh qovşağı rolunu oynaya biləcəyi bir vəziyyətdə olduğumuzu real olaraq hissə etməsinin təmin edilməsi baxımından bütün məzmun dəyişdirilməlidir".

Klaar həmçinin Ermənistanın Avropa İttifaqı ilə münasibətlərinin genişləndirilməsində və Avropa Sülh Fondu çərçivəsində Yerevanın dəstəklənməsində maraqlı olmasını alqışlayıb. "Biz Avropa İttifaqı üçün yaxşı tərəfdaş və Azərbaycan da daxil olmaqla, öz qonşuları üçün də eyni dərəcədə yaxşı tərəfdaş olacaq güclü, özündən əmin Ermənistan görmək istəyirik", deyə Toyvo Klaar bildirib. 0