Azərbaycan Alpinizm Federasiyasının bəyanatı

 Son günlər özlərini “dağ idman növləri veteranları” hesab edən dörd nəfər, bir sıra qəzet və saytlarda bəyanat yayıblar. Həmin şəxslər Azərbaycan Alpinizm Federasiyasını (AAF) bütün “ölümcül günahlar”da ittiham edirlər. Bir gün öncə bunu Ekologiya və Təbii Sərvətlər Nazirliyinin səlahiyyətli işçisi da etmək istəyirdi.

Biz bu nəşrdə ifadə olunmuş böhtan xarakterli ittihamları qətiyyətlə rədd edirik və bunu Azərbaycan Alpinizm Federasiyasının hüquqlarının pozulmasının davamı kimi qiymətləndiririk. Və yenə də hesab edirik ki, bu əməllərin arxasında AAF-nın qanunsuz olaraq tabe etdirilməsi, dəqiq desək, zəbt edilməsi məqsədi var.

Növbəti dəfə Ekologiya və Təbii Sərvətlər Nazirliyi ilə FAIREX nümayəndələri öz sevimli üsullarından – BÖHTANdan istifadə ediblər. Özü də bu böhtan, uydurulmuş idman dərəcəli şəxslərin adından yayılır: məsələn, “dağ idman növləri”(?!) üzrə SSRİ idman ustası – belə bir dərəcə heç vaxt olmayıb və indi də yoxdur!

Bu bəyanatlar müxtəlif imzalarla imzalandığına baxmayaraq, üslub baxımından açıq-aydın görünür ki, bu yazıların arxasında Ekologiya və Təbii Sərvətlər Nazirliyi və FAİREX rəhbərliyi dayanır.

Bizə məlumdur ki, KİV rəhbərlərini, hüquqşünasları, AAF nümayəndələrini fərdi söhbətlərə çağırır, hədə-qorxu və dilə tutma vasitəsilə onları öz tərəflərinə çəkir və AAF-dan imtina etməyə vadar edirlər. Bütün bunlar, bizi ictimaiyyətin gözündə nüfuzdan salmaq məqsədilə  edilir.

Özünün birbaşa vəzifələri ilə məşğul olmaq əvəzinə, bu insanlar dövlət vasitələrini və vəsaitlərini idmançılarla mübarizə üçün xərcləyir, nüfuzlu insanları alçaldır və buna da “milli maraqları qorumaq” adını qoyurlar. Hətta iş o yerə çatıb ki, beynəlxalq arenada Azərbaycanın şərəfini qoruyan tanınmış idmançıları digər ölkələrin maraqlarına xidmət etməkdə ittiham edirlər...

Beləliklə, bizim opponentlərin TEZİSləri hansılardır?

BİRİNCİ TEZİS: Alpinizm Federasiyası “ölüb” və bu idman növü yalnız Ekstremal idman növləri federasiyası hesab edilən FAİREX-in fədakar işi hesabına “dirçəlib”...

Doktor Qebbelsın ifadəsi burada yada düşür: “Yalan nə qədər dəhşətli olsa, bir o qədər çox ona inanırlar”. Amma həqiqət budur ki, 1963-cü ildən mövcud olan AAF, demək olar, yarım əsr boyu Qayayadırmanma üzrə Respublika və şəhərlərarası yarışlar keçirib. Tədbirlər həmişə Gənclər və İdman Nazirliyinin, öncə isə İdman üzrə Dövlət Komitəsinin dəstəyi ilə baş tutub.

Lakin buyaxınlardan etibarən hər hansı izahat olmadan Gənclər və idman Nazirliyi bu və ya digər tədbirlərin keçirilməsini 2006-cı ildə yaradılmış FAİREX-ə tapşırıb. FAİREX bu yarışları öz bildiyi kimi keçirir, yarışların təşkilatçılığına beynəlxalq hakimlik akkreditasiyası, təşkilatçılıq təcrübəsi və Dünya Kuboklarının keçirilməsi təcrübəsi olan AAF-ın mütəxəssislərini cəlb etmir. Bu isə artıq milli səviyyədə keçirilən yarışın səviyyəsinin azaldılmasına gətirib çıxarıb.

Misal kimi, 1999-cu ildən etibarən AAF-ın “Heydər Zirvəsi”nə təşkil etdiyi ənənəvi ekspedisiyanı göstərə bilərik. Lakin keçən il Gənclər və İdman Nazirliyi “qəflətən” FAİREX-ə bu ekspedisiyanı təşkil etmək üçün 58 min manat vəsait ayıraraq, tədbiri keçirmək hüququnu FAİREX-ə vermişdir.

Eynilə FAİREX-ə digər alpinizm üzrə tədbirlərin və yarışların keçirilməsi üçün hüquq və vəsait verilmişdir. 2012-ci il üzrə ümumi ayrılan məbləğ 100 min manata yaxın olmuşdur. Bu pullar Gənclər və İdman Nazirliyinindir, yəni dövlət vəsaitidir. Nə FAİREX-in, nə Qərb Universitetinin, nə də Ekologiya Nazirliyinindir.

Sual olunur, elə isə, xidməti vəziyyətindən sui-istifadə edən kimdir?

İKİNCİ TEZİS: AAF pərdəsi arxasında fırıldaqçılar qrupu çalışır...

Bu ilin əvvəlində Gənclər və İdman Nazirliyi ilə Ekologiya və Təbii Sərvətlər Nazirliyi özbaşına dağ idman növləri üzrə bir Assosiasiyanın yaradılması təşəbbüsü ilə çıxış etmişlər (təbii ki, FAIREX-in himayəsi ilə) və həmin assosiasiyaya alpinizm üzrə bütün tədbirlərin keçirilməsi hüququ verilmişdir. Əslində, bu, alpinizmin monopoliyasını qanuniləşdirmək cəhdi idi. Nəticə kimi, bu il Ekologiya Nazirliyi ekspedisiyanı FAİREX-in rəhbərliyi altında keçirməyi tələb edib. Bütün dövlət müəssisələrinə (Vergilər Nazirliyi, MTN) göstəriş verilmişdir ki, Alpinizm Federasiyası nümayəndələrilə dağlara yürüşlər etməsinlər, halbuki əvvəllər həmin qurumlar AAF-ın siyahılarına daxil idilər.

Bilməyənlər üçün məlumat verək ki, FAIREX hava və ekstremal idman Federasiyasıdır, delta-plan üzərində uçmaq üçün nəzərdə tutulmuşdur. Deyilənlərə görə, o Federasiyanın üzvlərindən biri uçuş zamanı yerə çırpılıb, bundan sonra qərara alınıb ki, Federasiyanın qisməti alpinizmdir...

ÜÇÜNCÜ TEZİS: Alpinizm Federasiyasında satqınlar və xarici agentlər toplaşıblar...

Xırdaçılıq və qisasçılıq dövlət məmuru üçün heç də yaxşı keyfiyyət deyil, özü də yüksək vəzifəli məmur üçün. Nə vaxtdan xarici legionerləri dəvət etmək, Qərb Universitetinin tələbələrini və Ekologiya Nazirliyinin işçilərini dağlara aparmaq idman təbliği olub?

Eyni zamanda Ekologiya Nazirliyi Şahdağ Milli parkı ərazisinə onlarla, habelə yüzlərlə AAF üzvlərini alpinizm üzrə tədbirlərin və yarışların keçirilməsi üçün buraxmır. Bu səbəbdən ölkəmizin aparıcı idmançıları Rusiya Federasiyasının Dağıstan Respublikasına və Gürcüstana getməli olurlar... Məgər bu şərait idmanın inkişafı adlanır?

Sual olunur: Kimdir satqın? Kim Azərbaycan idmanının düşmənidir?

Nəticə çıxarmaq üçün hər iki tərəfin nailiyyətlərinə baxmaq kifayətdir:

AAF üzvləri son illər ərzində Himalayda, Pamirdə, Tyan-Şan və Şimali Qafqazda onlarla mürəkkəb dırmanmalar həyata keçirmişlər. Bu nailiyyətlərin böyük bir hissəsi Azərbaycan alpinizmi tarixində ilk dırmanmalar və keçən marşrutlar olub. Bəzən alpinistlərimiz həyatları üçün təhlükəli olan anlarda belə, Milli Bayrağımızı, hündürlüyü yeddi və səkkiz min metrdən çox olan zirvələrə sancmışlar.

Cəmi bir neçə gün əvvəl AAF üzvü Murad Aşurlı Azərbaycanın bayrağını dünyanın ən yüksək nöqtəsi olan Everest (8848 m) üzərində dalğalandırıb. Ona qədər bizim bayrağımız iki dəfə Everestin üzərində sancılmışdır, hər iki halda da AAF-ın fədakar üzvlərin sayəsində. Son illər biz onlarla beynəlxalq yarışlarda iştirak etmişik və layiqli yerləri tutmuşuq.

AAF nümayəndələri beynəlxalq arenada Azərbaycanın maraqlarını uğurla təmsil edirlər, beynəlxalq federasiyalarda aparıcı vəzifələri tutaraq alpinizm idman növlərinin Olimpiya Oyunlarının proqramına salınmasına və Dünya Çempionatların keçirilməsinə dair yeni fikirlər irəli sürürlər.

Azərbaycan adına görülən bütün bu işlərin adını “xəyanət”, “digər ölkələrin maraqlarına qulluq etmək” qoymaq hansı məntiqə və vicdana sığır?

Alpinizm əleyhdarlarının hərəkətlərində məntiq axtarmaq mənasızdır. Yalan, böhtan, faktların təhrif olunması, “xalqın düşmənlərini və xainlərini” axtarmaq Azərbaycan xalqının simalarını, ziyalılarını məhv edən Mircəfər Bağırovun vaxtlarını xatırladır...

Və sonda. Bizi vətənpərvər olmamaqda, “Azərbaycan dilini bilməməkdə” (?) ittiham edən şəxsə sualımız: niyə federasiyanızın adı ingilis dilindədir? Axı FAİREX – “Air and extreme sports federation of Azerbaijan” deməkdir...

Bizim federasiyamızın adı isə Azərbaycan dilindədir: AAF – Azərbaycan Alpinizm Federasiyası...

Azərbaycan Alpinizm Federasiyasının Rəyasət heyəti