Azərbaycanın hakimiyyət orqanları ilə vətəndaş cəmiyyəti institutlari arasında dialoqun mümkünlüyü

10 fevral 2011-ci il tarixdə Prezident İlham Əliyev ölkə vətəndaşlarına müraciət edərək bildirdi ki, "Biz ölkəmizi müasirləşdirməliyik, bütün cəhətlərdən - həm siyasi islahatlar, həm də iqtisadi islahatlar baxımından inkişaf etmiş ölkələrin səviyyəsinə çatdırmalıyıq. Ölkədə ictimai nəzarət daha da güclü olmalıdır, rüşvətxorluğa, korrupsiyaya qarşı mübarizə daha da ciddi aparılmalıdır. Bu məsələlərin həlli ilə bağlı bu ilin əvvəlində Nazirlər Kabinetinin iclasında verdiyim tapşırıqlar yerinə yetirilir. Mən sizdən və Azərbaycanın bütün vətəndaşlarından xahiş edirəm ki, bütün xoşagəlməz hallar haqqında, bütün ədalətsizliklər haqqında, əsassız tələblər haqqında Prezident Administrasiyasına və digər müvafiq qurumlara, yerli icra hakimiyyəti orqanlarına məlumat versin ki, biz bu nöqsanları, bu yaraları daha da tezliklə aradan qaldıraq".

Azərbaycan Respublikasının Prezidentinin Müraciətinə səs verərək, mən bu məlumat № 4-də Bakı şəhər İcra Hakimiyyətinin başçısı H.Abutalıbov və komandası tərəfindən vətəndaşların mülkiyyət hüququna qarşı özbaşınalığından və böyük miqyaslı korrupsiya faktlarını bildirmək istərdim. Bu məlumatın surəti Korrupsiyaya qarşı Dövlət Komissiyasının sədri cənab Ramiz Mehtiyevə də göndərilir.

Sülh və Demokratiya İnstitutnun Informasiya № 2-də (əlavə olunur) geniş şəkildə bildirilirdi ki, AR Konstitutsiyasının, Mülki və Mənzil Məcəllələrinin müvafiq maddələrinin Bakı şəhər İcra Hakimiyyətinin başçısı H.Abutalıbov və Nəsimi rayon İcra Hakimiyyətinin başçısı Nəsib Məhəməliyev tərəfindən kobud şəkildə pozularaq Füzuli və Şəmsi Bədəlbəyli küçələrində yaşayan sakinlər öz mənzillərindən və evlərindən zorakılıqla deportasiyaya, qovulmaya, köçürülməyə məruz qalırlar. Indi də Mirzəağa Əliyev küçəsinin sakinləri bu zorakılığa məruz qalıblar. Zorakılıqla köçürülmə polis zorakılığı ilə müşaiət olunur ki, bu da Polis haqqında Qanuna və Cinayət Məcəlləsinə ziddir. Ona görə də bu müraciətin surətini Daxili İşlər Naziri canab Ramil Usubova da göndərilir.

Baxmayaraq ki, əvvəliki müraciətlər (22 və 31 yanvar 2011ci il tarixlərdə) Prezident Administrasiyasına, Baş Prokurorluğa, Konstitusiya, Ali və Appelyasiya Məhkəmələrinə, DİN, MTN, ƏN, Bakı şəhər İcra Hakimiyyətinə və Nəsimi rayon məhkəməsinə göndərilmişdir, ancaq bu günə kimi nə Baş Prokurorluq, nə də Korrupsiyaya qarşı Dövlət Komissiyası tərəfindən adları çəkilmiş dövlət məmurlarının qanunsuzluğa yol vermələri yoxlanılmır.

Bunu nəzərə alaraq biz adları çəkilmiş dövlət məmurları tərəfindən ölkə qanunvericiliyinin və beynəlxalq hüququn pozulması faktlarının müstəqil analizinin aparılmasına məcburuq və bu məmurların cinayət məsuliyyətinə calb edilməsini tələb edirik. Nəzərə alsaq ki, 7-11 fevral 2011ci il tarixlərdə Şəmsi Bədəlbəyli küçəsində yaşayanlara qarşı İcra Hakimiyyəti orqanları tərəfindən edilmiş zorakılıq bütün sərhədləri aşmış və polis zorakılığı ilə müşaiət olunmuşdur. İcra Hakimiyyətinin əməkdaşları Nəsimi rayon Polis İdarəsinin əməkdaşlarının müşaiəti ilə (Nəsimi rayon Polis İdarəsinin rəisi Məmməd Mikayılovdur) sakinlərin mənzillərinə HEÇ BİR QANUNİ ƏSAS OLMADAN zorla daxil olaraq mənzillərin boşaldılmasını tələb etmişlər.

Beləliklə, H.Abutalıbovun rəhbərlik etdiyi Bakı şəhər İcra Hakimiyyətinin əməlləri AR Cinayət Məcəlləsinin aşağıdakı maddələrinin təsiri altına düşür: maddə 107 - Əhalini deportasiya etmə və ya məcburi köçürmə (on ildən on beş ilədək müddətə azadlıqdan məhrum etmə ilə cəzalandırılır), maddə 157.3 - Mənzil toxunulmazlığını pozma (üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə üç ilədək müddətə azadlıqdan məhrum etmə ilə cəzalandırılır),maddə 186.2 - Əmlakı qəsdən məhv etmə və ya zədələmə (üç ildən yeddi ilədək müddətə azadlıqdan məhrum etmə ilə cəzalandırılır), maddə 309.2 - Vəzifə səlahiyyətlərini aşma (əmlakı müsadirə olunmaqla üç ildən yeddi ilədək müddətə azadlıqdan məhrum etmə ilə cəzalandırılır),maddə 322.2 - Özbaşınalıq (üç ilədək müddətə azadlığın məhdudlaşdırılması və ya iki ilədək müddətə azadlıqdan məhrum etmə ilə cəzalandırılır).

Vətəndaşların mənzillərinə zorla daxil olan, onları zorakılıqla polis məntəsinə aparan və orada saxlayan Nəsimi rayon Polis İdarəsinin əməkdaşlarının (Nəsimi rayon Polis İdarəsinin rəisi Məmməd Mikayılovdur) əməlləri AR Cinayət Məcəlləsinin aşağıdakı maddələrinin təsiri altına düşür: Maddə 145.2.5 - Qanunsuz azadlıqdan məhrum etmə (üç ildən beş ilədək müddətə azadlıqdan məhrum etmə ilə cəzalandırılır), maddə 145.3 (beş ildən on ilədək müddətə azadlıqdan məhrum etmə ilə cəzalandırılır), maddə 157.3 - Mənzil toxunulmazlığını pozma (üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə üç ilədək müddətə azadlıqdan məhrum etmə ilə cəzalandırılır).

Beləliklə, sual yaranır. Nə üçün indiyədək Bakı şəhər İcra Hakimiyyətinin başçısı H.Abutalıbovun, qanunsuzluqların birbaşa icraçısı - Bakı şəhər İcra Hakimiyyəti katibliyinin rəhbəri Zülfalı İsmayılovun, Nəsimi rayon Polis İdarəsinin rəisi, polkovnik Məmməd Mikayılovun və zorakılıqları və qanunsuzluqları birbaşa həyata keçirmiş polis əməkdaşlarının qanunsuz əməlləri hüquqi qiymətini almamışdır?!!!

Törətdikləri cinayətin miqyasını yaxşı bilən H.Abutalıbov və onun komandası cinayət məsuliyyətindən yayınmaq üçün 24 Sentyabr 2008-ci ildə 511 saylı sərancam vermişlər. Həmin sərancama əsasən sakinlərin mülkiyyətini almaq məqsədilə hansısa "fiziki şəxs Kazımov Rufan Habil oğlu sakinlərlə danışıq aparmaq, onların köçürülməsini təmin etmək və müqavilə bağlamaq" səlahiyyəti verilmişdir. Imza - H.Abutalıbov!

Daha doğrusu, Kazımov Rufan Habil oğlu ilə "alqı-satqı" müqaviləsi bağlamaq üçün vətəndaşlar hər cür zorakılığa məruz qalır, o cümlədən də mənzilləri dağıdılır, onlar küçələrə tökülür, azadlıqdan məhrum edilir və polis bölmələrində təzyiqlərə məruz qalırlar.

Görünməmiş maliyyə pozuntusunun miqyasına misal - beş milyon manatın Azərbaycan Respublikası Dövlət Neft Şirkətindən (ARDNŞ) hansısa Kazımov Rufan Habil oğlunun hesabına köçürülməsidir. Bu məbləğ 511 saylı sərancamda göstərilib.

Nə vaxt ki, ARDNŞ-nin rəhbəri Rövnəq Abdullayev belə məbləğn hansısa Kazımov Rufan Habil oğlunun hesabına köçürülməsinin nəticələrini başa düşdü, o zaman ARDNŞ pulun Kazımov Rufan Habil oğlunun hesabına köçürülməsini dayandırdı və bundan sonra maliyyə vəsaiti Bakı şəhər İcra Hakimiyyətinin hesabına köçürüldü. Maliyyə pozuntularını öz üzərinə götürən H.Abutalıbov və Bakı şəhər İcra Hakimiyyəti bu pulu Kazımov Rufan Habil oğlunun hesabına köçürmüşlər. Beləliklə də Füzuli və Şəmsi Bədəlbəyli küçələrindəki daşınmaz əmlaka görə xərclər Kazımov Rufan Habil oğlunun hesabından ödənilib.

Bax beləcə dövlət məmurları açıq-aşkar Azərbaycan qanunvericiliyini və beynəlxalq hüququ pozurlar.

Ali Məhkəmənin Sədri cənab Ramiz Rzayev bir neçə dəfə açıq şəkildə Azərbaycan hakimlərini dövlət məmurlarının hüquqpozmalarına dair işlərdə qanuna və hüquqa əsaslanmağa çağırmışdır. Prezidentə ünvanlanmış bu Müraciətin surətini eyni zamanda o ümüdlə cənab R.Rzayevə göndəririk ki, onun sözləri ilə işi eyni olacaqdır.

Birinci məhkəmə instansiyasının qərarını yaxın zamanlarda biləcəyik. Leyla və Arif Yunusovların H.Abutalıbova qarşı qaldırdıqları iddia Nəsimi rayon məhkəməsinin hakimi Emin Əhmədovun icraatındadır.

Müraciətin mətni yuxarıda göstərilən ünvanlara sürətli poçtla göndərilmişdir, bundan başqa KİV-ə təqdim olunmuş və ingilis dilinə tərcümə olunaraq Avropa Birliyinin, Avropa Şurasının, ATƏT-in müvafiq strukturlarına və beynəlxalq hüquq-müdafiə təşkilatlarına göndərilmişdir.

Leyla Yunus