Biz, küçədən keçən dəstə deyilik, yüksək dərəcəli alpinistlərik

Azərbaycan hava və ekstremal idman növləri federasiyası FAİREX tərəfindən Azərbaycan Alpinizm Federasiyası əleyhinə aparılan çirkli kampaniya davam etməkdədir.

AAF-nın draytulinq üzrə Kubokun pozulması cəhdlərindən sonra FAİREX-in sakitləşməyən rəhbərliyi Ekologiya və təbii sərvətlər nazirliyinin əməkdaşları vasitəsi ilə Alpinizm Federasiyasına qara yaxıb, onun dediklərini yalan və provokasiya adlandırır, federasiyanın özünü isə bir qrup fırıldaqçı kimi təqdim edir.

Xatırladaq ki, AAF-nın Qusar rayonunun Ləzə kəndində keçirilməsi planlanan Kubok yarışının hazırlanması üçün xaricdən dəvət olunan mütəxəssislər silah təhdidindən tutmuş müxtəlif növ təzyiqlərlə qarşılaşıblar.

Ilk öncə bir qrup naməlum şəxs idmançılardan bütün hazırlıqları durdurub rayondan getmələrini tələb edirdi, sonra isə həmin şəxslərə yerli icra hakimiyyəti və polis də qoşulub.

Yarış gecəsi kimsə idmançıların təhlükəsizlik məqsədi ilə əvvəlcədən asılan ip və kəndirlərini kəsmişdir.

Yeri gəlmişkən, Ekologiya və təbii sərvətlər nazirliyinin müavini Firdovsi Əliyev ipləri kəsməkdə elə alpinistlərin özlərini ittiham etməkdən başqa bir yol tapmayıb. Əvvəl idmançıların şikayətini ağ yalan adlandıran cənab Əliyev sonradan fikrini dəyişərək, bildirib ki, kəndirləri kəsən elə alpinistlərin özüdür.

Vəziyyətə aydınlıq gətirmək üçün Azərbaycan Alpinizm Federasiyanın ən hörmətli nümayəndələrindən biri, AAF-nın keçmiş prezidenti, reyasət heyətinin üzvü, idman stajı 50 ilə bərabər olan, Azərbaycan alpinizminin canlı əfsanəsi kimi tanınan Rasim Cəfərov nəyin necə baş verdiyini danışmaq qərarına gəlib.

“AAF Kubokunun ilk yarış günü olan şənbə günü Ləzə kəndinə gəldiyimizdə gördük ki, yerli sakinlərin əksəriyyəti küçədə yığışıb nəisə müzakirə edirlər. Həyacanlı kəndlilər bizə bildirdilər ki, yerli hakimiyyət onları, kəndə bir neçə gün əvvəl yarışı hazırlamaq üçün gəlib evlərində qalan alpinistləri qovmağa məcbur edir.

Bundan savayı, kənd camaatına bildiriblər ki, yarışa gələn idmançıları evinə gecələmək üçün buraxan adamar işlərindən qovulacaq.

Bir az keçəndən sonra kəndə Qusar rayon Gənclər və idman idarəsinin rəisi Emil Əmirmətov gəldi və bizi təbiəti pozmaqla və dağlara ziyan vurmaqla ittihamlandırıb yarışı dayandırmağı tələb etdi.

Biz, heç nəyə baxmadan yarışımızı keçirməyə qərarlı idik, lakin ilk idmançımız yarışa başlayan kimi, bizə yaxınlaşan və təxminən 20 nəfərdən ibarət olan bir qrup adam dağın qabağında dayanıb yolumuzu bağladı.

Həmin adamlardan kim olduğunu, təqdim etdikləri qurumun adını açmalarını tələb etsək də bir şey öyrənə bilmədik. Lakin onların yanında Şahdağ milli parkının direktoru Arzu Mustafayevin olması bizə həmin şəxslərin arasında Ekologiya nazirliyinin əməkdaşlarının olmasını da təxmin etməyə əsas verir. Halbuki Ekologiya nazirliyi bəyan edir ki, bu hadisələr ərəfəsində əməkdaşlarının heç birisi Ləzə kəndində olmayıb.

Bu şəxslərlə söhbət etməyə çalışdığımız zaman yarış yerinə polkovnik-leytenantın rəhbərliyi altında bir dəstə polis gəldi.

Həmin polkovnik-leytenant vaxt itirmədən olduqca kobud şəkildə yarışı dayandırmadığımız halda bizi dağdan təpiklə saldıqlarının bizə bildirdi.

Bütün bu zaman ərzində kəndə və yarış yerinə gələn adamların heç birisi bizə yarışı keçirməyimizi qadağa edən heç bir sənəd təqdim etmədi.

Yuxarıda qeyd etdiyim kimi, Ekologiya və təbii sərvətlər nazirliyi bəyan edir ki, onun əməkdaşları orada olmayıb, və baş verən bütün hadisələr tamamilə AAF-nın provokasiyasıdır.

Buna cavab olaraq biz yerli hakimiyyətlə qabaqcadan razılaşdırılmış yarışımıza mane olmağa çalışan bütün şəxsləri göstərən foto və videoları təqdim edə bilərik.

Bir daha xatırladım ki, Azərbaycan Respublikasının qanunvericiliyində elə bir qanun yoxdur ki, hər hansısa federasiya, daxili yarışları keçirmək üçün nazirlik daxil olmaqla müxtəlif strukturlardan icazə almalıdır. Elə qanun olsaydı AAF buna əlbəttə ki riayət edərdi, cünki federasiyanın hər bir üzvü qanuna tabe olan vətəndaşdır. Hazırda vəziyyət elədir ki, Gənclər və İdman Nazirliyi ilə razılaşdırılan yarışlar yalnız nazirliyin təqvim planında təsdiq olunan və respublika statusuna malik olan yarışlardır.

Biz, qanuna müvafiq olaraq, yerli icra orqanlarını AAF Kuboku haqqında xəbərdar etdik, cavabında isə icra hakimiyyəti yenə də qanuna müvafiq şəkildə federasiyamıza hər cür dəstək göstərməli idi.

Onu da qeyd edim ki, yarışdan bir gün avvəl AAF nümayəndələri Qusar rayonunun icra hakimiyyətinin rəhbəri müavini Elman Mustafayevlə görüşüb, və görüş zamanı o bildirib ki, yerli rəhbərlik tədbir haqqında xəbərdardır və AAF ilə bununla bağlı heç bir problemı yoxdur.

Sonra bizə məlum oldu ki, yarışdan bir az əvvəl, dekabrın 13-dən 14-nə keçən gecə Qusar rayonunun polis bölməsinə Ekologiya və təbii sərvətlər nazirliyinin 5-ci ərazi bölməsindən (Xaşmaz rayonu) R.M.Abdullayev adlı rəhbəri adından məktub gəlib, və bu məktubda Ləzə kəndi yaxınlığında guya ki qeyri-qanuni yarış keçirmək istəyən AAF nüməyəndələrinə aid tədbir görməyi xahiş olunur. Dekabrın 14-də yarış yerinə gələn polislərlə söhbət edib qanun çərçivəsində hərəkət etdiyimizi izah etməyə çalışsaq da, bizi dinləyən olmadı. Beləliklə də, hüquqmüdafiə orqanlarını aldadan Ekologiya nazirliyinin nümayəndələri faktiki olaraq AAF-nın tədbirini pozublar.

Draytulinq marşrutlarını hazırlayan zaman qayalara “ziyan vurulması” ilə bağlı ittihamlara gəldikdə isə onu deyə bilərəm ki dünyada elə bir ölkə yoxdur ki, dağlarında idmançıların təhlükəsizliyini təmin edən dəmir sığorta boltların vurulması qadağa edilsin.

Ekologiya nazirliyi, onların dalınca da İdman nazirliyi sığorta kəndirini saxlamaq üçün qayaya vurulan həmin bu boltları “təbiətə vurulan ziyan” kimi qələmə verir. Nəticədə bəzi vicdansız məmurlar camaatın dağ idman növləri haqqında xəbərdar olmadığından sui-istifadə edib, KİV-də söz hiyləbazlığı vasitəsi lə həmin boltları az qala ekoloji faciəyə çeviriblər.

Azərbaycan Alpinizm Federasiyası bu il 50-illiyini qeyd edir, birinci il deyil ki, biz bu növ yarışlar təşkil edirik və bunların harada və necə keçirilməsi haqqında çox gözəl bilirik. Ötdüyümüz illər ərzində belə bir biabırçı hərəkətlə ilk dəfədir ki, rastlanırıq.

Nəyə görə Federasiyamızı “özbaşınalıqla məşqul olan dəstə” adlandırırlar?! Biz, küçədən keçən dəstə deyilik, biz, yüksək dərəcəli idmançı, təlimatçı, Azərbaycanın milli bayrağını dünyanın hər bir qitəsinin ən yüksək zirvələrində qaldıran alpinistlərik.

Ən əsası isə odur ki, Azərbaycan Alpinizm federasiyası Respublikamızın qanunlarına müvafiq olaraq registrasiya olunmuş təşkilatdır, hüquqi şəxsdir. Biz tələb edirik ki KİV-lərdə adımız çəkilən zaman heç kim bizim rəsmi qeydiyyatdan keçmiş təşkilat olduğumuzu şübhə altına qoymasın, əks halda biz müvafiq məhkəmə orqanlarına müraciət edib böhtançıları məsuliyyətə cəlb edəcəyik”.