Daxili siyasi qarşıdurma Ermənistanın mövqelərini zəiflədir

Ter-Petrosyanın fikrincə, “hazırki daxili siyasi qarşıdurma” Ermənistanın qarşıdan gələn çətin danışıqlarda mövqeyini gücləndirmir, əksinə zəiflədir.

“Güzəşt etməmək və status-kvonu saxlamaq siyasətinin milli fəlakətə səbəb olduğunu sübut etməyə ehtiyac yoxdur və fəlakətdən sonra hətta bu siyasətin keçmiş tərəfdarlarının bəziləri bunu etiraf edirlər.

Bununla belə, eyni zamanda, bir çoxları özlərinə haqq qazandırmaq üçün güzəşt yolunu seçmir, eyni şeyin olacağını sübut etməyə çalışırlar. Bu, tamamilə əsassız, pafoslu, özünü doğrultmaq cəhdindən başqa bir şey deyil, çünki tarixi geri döndərmək mümkün deyil. Odur ki, Qarabağ münaqişəsinin kompromis həllinin əleyhdarları (dövlət xadimləri, partiya rəhbərləri, ziyalıların nümayəndələri) nə qədər öz antimilli əməllərinə haqq qazandırmağa çalışsalar da, gec-tez tarixin məhkəməsi ilə üz-üzə qalacaqlar. Məhz belə bir taleyin reallaşması onları hələ də öz fəlakətli davranışlarına hər cür bəraət qazandırmağa məcbur edir ki, bu da təəssüf ki, Ermənistanda və Qarabağda mövcud böhranı daha da dərinləşdirir”, - Ermənistanın birinci prezidenti qeyd edib.

Levon Ter-Petrosyan vurğulayıb ki, bugünki müxalifətin əsas məqsədinin nə olduğu bəlli deyil. “Serj Sarkisyanın köməyi ilə Nikol Paşinyan “təslim oldu” və satqın damğasını aldı. Bu, belədir, ancaq həqiqətin yarısıdır. Əslində təslim olan Paşinyan deyil, Ermənistandır.  Paşinyan yalnız Ermənistanın təslim olması ilə bağlı bəyanat imzalayıb. Ona görə də Paşinyanın yerində kim olsaydı - Robert Köçəryan, Serj Sarkisyan və ya deyək ki, İşxan Saqatelyan, onlar itaətkarlıqla Ermənistanın üzərinə qoyulacaq qərar qəbul edərdilər”, - Ter-Petrosyan bildirib.

Eks-prezidentin sözlərinə görə, problem Ermənistan liderinin şəxsiyyətindən asılı deyil. “Əgər bu sadə həqiqət dərk edilməsə, ölkəmizdə daxili siyasi təlatümlər davam edərsə, o zaman Paşinyan və ya başqasının yekun sənədi imzalamasından asılı olmayaraq, bizim üzərimizə qoyulan qərarlar daha ağrılı olacaq”, - deyə o vurğulayıb.

“Sual yaranır: indiki müxalifət liderləri bunu dərk edirlərmi? Bunu dərk etmirlərsə, deməli, siyasətdən heç nə başa düşmürlər. Və əgər fərqindədirlərsə, amma daxili siyasi təlatümləri davam etdirirlərsə, deməli, milli maraqlarla heç bir əlaqəsi olmayan tamam başqa məqsədlər güdürlər. Müxalifətin təşkil etdiyi nümayiş, yürüş və mitinqlərlə bağlı indiki hakimiyyətin sərt addımlarının milli maraqlarla heç bir əlaqəsi yoxdur. Ümidsiz optimist olaraq hələ də gözləyirəm ki, Paşinyan və onun əleyhdarları nəhayət öz mövqelərinin təhlükəsini dərk edəcəklər, vəziyyəti daha da çətinləşdirməmək və yeni təhlükələrdən qaçmaq üçün hansısa razılaşmaya nail olmaq üçün səy göstərəcəklər”, - deyə Levon Ter-Petrosyan yazıb.

O qeyd edib ki, əgər ziyalıların nümayəndələri həqiqətən vətənpərvərlik fəaliyyəti ilə məşğul olmaq istəyirlərsə, “qoy Nikol Paşinyanı, Robert Köçəryanı, Serj Sarkisyanı bir masa arxasında oturmağa və daxili siyasi böhrandan çıxış yolu tapmağa məcbur etsinlər,”- Ermənistanın birinci prezidenti Levon Ter-Petrosyan deyib.