Dünyanın tanınmış şəxsləri hökumətlərin qaçqınlar üçün addımlar atmasına yönələn birgə çağırış kampaniyasına qoşulur

Ümumdünya Qaçqınlar Gününə hazırlıq getdiyi bir vaxtda bu gün yayılmış videomüraciət: Videoya burada baxa bilərsiniz:

https://youtu.be/Jtv4LCXEGEU

Bu gün BMT QAK bütün dünyanı qaçqınlarla birlikdə olmağa dəvət edən geniş kampaniyaya (#WithRefugees) başlayıb. Heyrətamiz videomüraciətdə dünyanın 60-dan artıq tanınmış şəxsi qaçqınlarla və yardım işçiləri ilə birlikdə olmaqla bu ismarıcı səsləndirirlər: "biz qaçqınların yanındayıq, xahiş edirik bizimlə birlikdə olun". Müraciətdə (petisiyada) hökumətlər dünyadakı zorla didərgin salınmış insanların mənafeləri naminə addımlar atmağa çağırılır.

Kampaniyanın məqsədi bir tərəfdən münaqişə nəticəsində didərginlik və təqib hallarının dramatik dərəcədə artması, digər tərəfdən isə qaçqınlar əleyhinə ritorikanın güclənməsi və sığınacaq hüququnun daha çox məhdudlaşdırılması fonunda köç etməyə məcbur olmuş ailələrə ictimai dəstək nümayiş etdirməkdir. Müraciət geniş qaçqın və miqrant köçləri probleminin həllinə dair BMT-nin Baş Assambleyasının sentyabrda keçiriləcək yüksək  səviyyəli tarixi plenar iclasından əvvəl ediləcək.

Konkret olaraq bütün hökumətlərdən xahiş ediləcək ki:

• hər bir qaçqın uşağın təhsil almasını;
• hər bir qaçqın ailənin həyatları üçün təhlükəsiz olan müəyyən bir yerdə yaşamasını;
• hər bir qaçqının öz icmasına müsbət töhfə verə bilməsi üçün işləyə və ya lazımi bacarıqlara yiyələnə bilməsini təmin etsinlər.

Videogörüntüdə İordaniyadakı "Zaatari" qaçqın düşərgəsinə baş çəkən BMT QAK-ın Xoşməramlı səfiri Keyt Blanşet (Cate Blanchett) kampaniyaya dəstək verməsindən danışır:

"Biz artıq milyonlarla günahsız ailələri yurdlarından ayrı salmış və çoxlu insanların təhlükəsiz məkana çatmağa cəhd edərkən həyatlarını itirmələrinə gətirib çıxartmış fəlakətli didərginlik böhranının içərisindəyik. Məsələnin yekun həlli siyasi həlldir – sülhə və sabitliyə ehtiyac var. Amma rəyini bildirmək hüququna malik insanlar olaraq biz bu həlli gözlədiyimiz müddətdə öz rolumuzu yerinə yetirə bilərik və yetirməliyik. Biz tələb etməliyik ki, bütün ölkələr qaçqınları müdafiə ilə, sığınacaqla və səmərəli həyat yaşamaq şansı ilə təmin etmək məsuliyyətini paylaşsınlar. Əgər bizlərdən kifayət qədər çox adam birlikdə olarsa, o halda bizi eşidərlər".

Blanşettin videomüraciətinə qoşulan BMT QAK-ın Xoşməramlı səfirləri arasında yazıçı Khaled Hosseini və supermodel, keçmiş qaçqın Alek Wek var. Dəstək göstərən digər şəxslər sırasına BMT-nin Baş katibi Pan Gi Mun (Ban Ki-moon), dini liderlər arxiyepiskop Desmond Tutu və V.Vajiramedhi həzrətləri, aktyorlar Benedict Cumberbatch, Chiwetel Ejiofor, Margot Robbie, Ben Stiller, Dame Helen Mirren, habelə müğənnilər Juanes, Mika, Maher Zain və Babaa Maal daxildir.

"Qaçqınlar bizimlə eyni arzu və ambisiyalara malik olan ana, ata, bacı, qardaş və övladdırlar, yeganə istisna ondan ibarətdir ki, taleyin burulğanı onların həyatlarını misli görünməmiş miqyasda qlobal qaçqın böhranına düçar edib", – bunu Khaled Hosseini deyib. "Biz qaçqınlarla həmrəy olaraq birlikdə tələb edə bilərik ki, dünya liderləri bu böhranın ədalətli və uzunmüddətli həlli yollarının tapılmasının kollektiv məsuliyyətini üzərlərinə götürsünlər. Buz birlikdə insanlığın və mərhəmətin qorxu və dözümsüzlük üzərində qələbəsini təmin etməliyik".

Hazırda münaqişə və təqib ucbatından evlərini tərk etməyə məcbur olmuş insanların sayı İkinci Dünya Müharibəsinin sonundan bəri ən yüksək həddədir. BMT-nin Qaçqınlar üzrə Ali Komissarı Filippo Qrandi qaçqınları dəstəkləməyə yönələn bu cür ictimai çağırışın nəyə görə edilməsindən danışıb.

"Biz dünyada dərinləşən münaqişə və qarışıqlıq dövründəyik ki, bu da əvvəlki dövrlərə nisbətən xeyli çox sayda insanların yurdlarını tərk etməsinə səbəb olub", – bunu Qrandi deyib. "Bu münaqişə hamımıza təsir göstərir və hamımızı əhatə edir və bu vəziyyətdə anlayış, mərhəmət və siyasi iradənin bir araya gətirilməsinə və qaçqınların ağır durumunun real həllinin tapılmasına ehtiyac var. Bu, dövrümüzün başlıca çağırışına çevrilib".

"2015-ci ildə milyonlarla yeni insanlar didərgin düşərək dünyadakı qaçqın və məcburi köçkünlərin sıralarına əlavə olundular. Əksər hallarda bunun təsirinə inkişaf etməkdə olan ölkələr daha çox məruz qaldılar, amma Avropa da dramatik səhnələrin şahidi oldu, belə ki, təhlükəsizlik və sığınacaq axtarışında olan yüz minlərlə insan Aralıq dənizini keçdi. Minlərlə insan yollarda öldü".

"Eyni zamanda, son dərəcə mərhəmət və həmrəylik göstərildi, belə ki, adi insanlar və icmalar evlərinin qapılarını və ürəklərini qaçqınlar üçün açdılar, bəzi ölkələr isə artıq çoxlu sayda qaçqınları qəbul etmiş olsalar da, yeni gələnləri qonaqpərvərliklə qarşıladılar".

"“Qaçqınlarla birlikdə olaq” (#WithRefugees) kampaniyasının və müraciətinin (petisiyasının) məqsədi bu qonaqpərvərlik səslərinin sayını artırmaq və dünyanın qaçqınlarla birlikdə olduğunu göstərməkdir".

Kampaniya kütləvi auditoriyanı səfərbər etməyə və qaçqınların işini dəstəkləmək üçün indiyədək ən çox sayda insanların qatıldığı müraciət (petisiya) ərsəyə gətirməyə yönəlib. Müraciəti burada imzalamaq olar: http://rfg.ee/z2bA301bNOn.

Videoya dəstək verən şəxslərin heç birindən müsahibə alınması mümkün olmayacaq.

Redaktorların nəzərinə:

BMT QAK-ın Xoşməramlı səfiri Keyt Blanşetin (Cate Blanchett) və Xaled Hosseyninin (Khaled Hosseini) şəkillərini burada tapmaq olar: http://media.unhcr.org/Share/kwun1u332tp2xd1px067gg10ttth3570.

Bütün fotolar üzərində müəlliflik hüququ BMT QAK-a məxsusdur: © UNHCR/Jordi Matas.

“Qaçqınlarla birlikdə olaq” (#WithRefugees) kampaniyası barədə əlavə məlumat üçün aşağıdakılara müraciət edin:

Cenevrədə: Stephen Pattison. Tel: +41 (0)22 739 8275 pattison@unhcr.org

Londonda: Leona Everitt. Tel: +44 (0)7966 134226 everittl@unhcr.org

“Qaçqınlarla birlikdə olaq” (#WithRefugees) kampaniyası barədə

BMT-nin qaçqınlar üzrə orqanı olan BMT QAK yurdunu tərk etməyə məcbur olmuş hər kəsin müdafiə ediləcəyi və özünə daha yaxşı gələcək qura biləcəyi dünyanın qurulması uğrunda çalışır. Hər il iyunun 20-də keçirilən Ümumdünya Qaçqınlar Günündə BMT QAK milyonlarla qaçqının gücünü, cəsarətini və dözümlülüyünü qeyd edir. Bu il Ümumdünya Qaçqınlar Günü hər kəsin yurdlarını tərk etməyə məcbur olmuş ailələrə dəstəyini göstərməsi üçün önəmli məqamdır. “Qaçqınlarla birlikdə olaq” (#WithRefugees) müraciətini (petisiyasını) imzalamaqla dünyanın hər yerindən olan insanlar hökumətlərə çağırış edə bilərlər ki, hökumətlər birlikdə işləsinlər və qaçqınların işinə yetərincə töhfələrini versinlər.

Videoya və müraciətə (petisiyaya) dəstək verən tanınmış şəxslərin tam siyahısı