Keçmiş MTN- çilər büdcəni nəyə və necə talayıblar?

Dostlar, bildinizmi milli təhlükəsizliyimizə cavabdeh olan şəxslər ölkəmizə qarşı olan agentura şəbəkəsini zərərsizləşdirmək əvəzinə daxildə vətəndaş cəmiyyətini, QHT rəhbərlərini, jurnalistləri ələ alıb onları agent etmək üçün dövlət büdcəsindən nə qədər pul "xərcləyiblər"?

Sonra da deyirik ki, necə olur ki, ermənilər ölkəmizdə agentura yarada bilir? Bunlar erməni, rus və s. kəşfiyyatını zərərsizləşdirmək əvəzinə daxildə agent ovuna çıxıblar və bunun üçün dövlət büdcəsindən milyonlarla pul çıxarıblar. Özü də bu pulların böyük qismi də keçmiş MTN rəhbərləri tərəfindən mənimsənilib. Ən azından dövlət büdcəsindən təkcə bir neçə ildə 7,7 milyon dollar mənimsənildiyi aşkar olunub

Məlum olub ki, pullar kassadan əsasən "Şimal küləyi" və "Qütb gecəsi" işi üzrə çıxarılıb.

"Qütb gecəsi" işi 2014-cü il fevralın 3-də MTN- nin Antiterror Mərkəzinin rəisi, general Elçin Quliyevin sanskiyası ilə açılıb, qərarı isə onun müavini polkovnik İlqar Əliyev hazırlayıb. İşin açılmasında məqsəd "Diplomatik nümayəndəlik və beynəlxalq təşkilatlar örtüyü altında sosial şəbəkələr mövqeyindən ölkəmizə qarşı kəşfiyyat-pozuculuq fəaliyyəti aparan Xarici Xüsusi Xidmət orqanları ilə əməliyyat oyunlarının keçirilməsi" olub. "Qütb gecəsi" işinə bir-biri ilə əlaqəsi olmayan, müxtəlif faktlar üzrə yazışmalar, telefon danışıqlarının şərhi, agentura məlumatlarından çıxarış əlavə olunub. Bəzi məlumatlar vacib əməliyyat əhəmiyyəti kəsb etsə də, onların ətrafında əlavə agentura əməliyyat tədbirləri keçirilməyib.

Arayışda agentlərlə bağlı hissədə qeyd edilib ki, bu iş üzrə 46 nəfərlə etibarlı münasibətlərin yaradılması, arxiv agentlərindən istifadə edilib.

İşi aparan polkovnik M.A şəxsən özünün əlaqəsində olan agentlər və onlara ayrılan pullar haqda istintaqa məlumat verib.

O bildirib ki, hüquq müdafiəçisi olan agentlə 2013-cü ilin oktyabr ayından münasibətlər yaradılıb. Noyabr ayından etibarən hər ay həmin şəxsə 2 min manat mükafat təyin edilib. Bu şəxsin 2014-cü ildə Strasburqa səfər xərclərinə görə 2500 manat ödənilib. O, ümumi xarakterli məlumatlar təqdim edib. 2015-ci ildən isə Hərbi Əks Kəşfiyyat İdarəsində Xidmətə rəsmi olaraq götürülüb.

İkinci agent isə QHT sədri olub. Onun rəhbəri olduğu ofisin saxlanılması, qəzetinin buraxılması üçün hər ay 6 min manat ödənilib, həmçinin, çoxsaylı səfərlərinin xərci qarşılanıb. Həmin şəxsə 2011-2015-ci illər ərzində 132 min manat, 6150 dollar və 2475 avro pul ödənilib.

Növbəti agent qəzet baş redaktorudur. Bu şəxs 2014-cü ilin yanvar ayından MTN-ə cəlb edilib. O, nazirliyə ötürdüyü bir məlumata görə 10 min manat mükafat alıb.

Agent "Əlizadə" isə 2014-cü ildə fəal istifadə olunduğuna görə 15 min manat mükafat alıb.

MTN-nin etibarlı şəxslərindən biri isə Azərbaycanın keçmiş naziri olub. Bu şəxsə ötürdüyü məlumatlara görə nazirlik tərəfindən 90 min manat pul ödənilib.

İstintaq materialında əlavə olaraq qeyd edilir ki, bəzi agentlərə heç bir ehtiyac olmadığı halda belə pullar ödənilib. Məsələn, kod adı "Samir" olan agentə 2013-cü il prezident seçkiləri ərəfəsində 4 ay ərzində 40 min , agent "Qəhrəman"a 2014-cü ildə 25 min manat mükafat verilib. Həmçinin, qeyd edilib ki, "Qəhrəman" fəal şəkildə əməkdaşlıq etdiyi üçün ona öncə 250 manat, sonra isə 600 manat aylıq maaş ödənilib.

Agentlərdən birinə isə böyük məbləğdə pullar ödənilib. Onun kod adı isə "Terminator" olub. Bu şəxsə 287 min avro, 5400 dollar və 12 min manat verilib. "Terminator" nazir müavini Hilal Əsadovun agenti olub və onun şəxsi işi generalın özündə olduğu üçün istintaq bu sənədlərlə tanış ola bilməyib.

Məlum olub ki, təkcə general Elçin Quliyevin idarəsi 2 əməliyyat işi çərçivəsində 5 milyon 148 min manat və 1 milyon 358 min dollar vəsaiti mənimsəyib.

Bu qeyd olunanlar yalnız bir idarənin- keçmiş MTN- nin xətti ilə həyata keçirilən maliyyə maxinasiyaları və dövlət büdcəsinin necə mənimsənilməsinə dair kiçik misallardır. İndi görürüsünüzmü xalqın boğazından kəsib hara və niyə, həm də necə xərləcyiblər? Sonra deyirik ki, ölkədə niyə aclıqdır, niyə bahalıqdır və büdcə boşalır?

Onu da qeyd etmək lazımdır ki, keçmiş MTN- də maliyyə maxinasiyalarında iştirak edənlərin bir hissəsi hələ də azadlıqda asudə gəzirlər...