MTRŞ, NƏ MTRŞ ?!!!

Azərbaycanın Milli Tele-Radio Şurası (MTRŞ) türk teleseriallarının Azərbaycan telekanallarında Türkiyə türkcəsində yayımına qadağa qoydu. Yeri gəlmişkən, qurumun bu qərarı xarici radioların milli tezliklərdə Azərbaycana yayımının dayandırılması qərarı ilə üst-üstə düşdü. Deməli, xarici radioların yayımı ilə türk teleseriallarının yayımının dayandırılması eyni vaxta təsadüf etdi və Türkyiə türkcəsi xarici dil sayıldı. Təsadüfdürmü?! Bu təqribən Azərbaycan aforizmi olan "molla burda ikən ölənin fatihəsini vermək" məsəlini yada salır.
SİYASƏTDƏ TƏSADÜF OLMUR
Xarci radioların yayımının qadağan olunmasını anladıq. Yəni, bu radiolar ölkədəki "bir para nöqsanları" deməklə məmurların qanını qaraldırdı, əhalini bu nöqsanlardan xəbərdar edirdi. Bəs bu binəva teleseriallar hansı günahın sahibi idilər, bax bunu başa düşmədik. Amma siyasətdə təsadüf olmur məsəli də gündəmdədir.
YƏQİN DİL VƏ MİLLƏT DƏYİŞİB
Mərhum dövlət başçısı Heydər Əliyevin Türkiyə-Azərbaycan münasibətlərilə bağlı "bir millət iki dövlət" fikrini dəfələrlə təkrar etməsi yaddaşlardan hələ silinməyib. Bax, bu qərar qəbul ediləndə düşündüm ki, yəqin, dil və millət dəyişib ki, MTRŞ belə qərar verib. Sonra türk telekanallarında verilişləri izlədim, gördüm yox, elə həmin tərkib, həmin ifadələr, həmin ləhcə yerindədir və millət də özünə türk deyir. Yenə də bir şey başa düşmədim, bəs nə dəyişib?!
ONDA DƏYİŞƏN SİYASƏTDİR
Əgər türk telekanallarında gördüklərim doğrudursa, o zaman dəyişən başqa bir nəsnədir və bu nəsnənin adı siyasətdir. Yəqin, Türkiyə siyasətini dəyişib və buna görə də MTRŞ sədri Nuşirəvan Məhərrəmli məcbur olub ki, belə qərar versin. Amma birdən yadıma düşdü ki, Türkiyədə siyasət dəyişməyib, çünki, Türkiyə bu yaxınlarda türk xalqlarının mədəniyyətlərini təbliğ etməyi nəzərdə tutan telekanalın açılışına hazırlaşır.
AZƏRBAYCAN SİYASƏTİNİ DƏYİŞDİRİR
Bax, bundan sonra yalnız bir nəsnə qalır ki, bu da Azərbaycanın siyasətini dəyişdirməsidir və bu bizdə adi bir şeydir. Deməli belə, əvvəlcə, yəni, teleseriallar neçə illər boyu ölkə telekanallarında yayımlandıqdan və əhali Türkiyə türkcəsinin incəliklərinə bələd olduqdan sonra MTRŞ rəhbərliyi bu qərara gəlir ki, sən demə, Türkiyə ləhcəsi başa düşülmür, həm də Türkiyə türkcəsi Azərbaycan türkcəsini "korlayır". Bu mənada N.Məhərrəmlinin məntiqinə söykənsək belə alınır ki, insan öyrəndikcə avam olur, yəni, bilmək tərəqqiyə yox, tənəzzülə aparır. Zəncilər demişkən, əla!
Axı, ortada bir "bir millət, iki dövlət" söhbəti var, bir millətdirsə eyni danışıq necə korlana bilər? Yox, eyni deyildirsə, onda niyə biz onlarla bir millətik?
BƏS İKİ DÖVLƏT MƏSƏLƏSİ?
Mən də N.Məhərrəmlinin məntiqilə düşünməyə başladım və hər şey şey yerini aldı. Əsas məsələ bir millət olmaq deyil, əsas məsələ iki dövlət olmaqdır. Niyə?
N.Məhərrəmli Azərbaycanın müstəqil dövlət quruculuğuna "can qoyduğu" və bu yolda "vardan yox olduğu" üçün "bir millət" yox, "iki dövlət" məntiqini irəli verib, mən də avam adam bilməmişəm ki, adam niyə belə qərar qəbul edir?
Ay camaat, aydın oldu da nə baş verib, bu teleseriallar niyə qadağan edilib, MTRŞ bizi hansı "ideoloji sapıntılar"dan xilas edib. Əgər bu qurum olmaya, əndirabadi bir şey olacaqdıq. Allah əmvatlarını rəhmət eləsin ki, vaxtında işdən duyuq düşüb, Türkiyə türkləri demişkən (desən yenə səhv etdim ) bizi rəzil olmaqdan xilas etdilər.
NƏ OLSUN E, DÖVLƏT İKİDİR, AXI MİLLƏT BİRDİR
Əstəğfürullah (indi də başladım ərəbcə) yenə də bu sual gəlir qabağa: cənab N.Məhərrəmli, biz bir millətik ya yox? Əgər bir millətiksə, bizim dilimizi kimdən xilas edibsən? Yox, bir millət deyiliksə, niyə bizə yalan deyirlər ki, bir millətik? Bəlkə başqa səbəb var biz bilmirik?
Hə, bir də dedilər ki, bu teleseriallar Azərbaycan türkcəsində dublyaj olunmalıdır, təsəvvür edin, bütöv bir aktyor ordusu bir neçə sözdən ötəri dublyaja cəm edilir. Bir az da aydın olsun deyə, 5-6 qram çəkisi olan bir işi görməyə azı 20-30 tonluq qüvvə yeridilir.
Eh, xəstəlik pis şeydir, görünür MTRŞ "mən də varam" xəstəliyinə çarə axtarır, odur ki, cəmiyyətə görünə bilmək üçün "əcaibiliyi" də fəaliyyət sayır.
Yüz ildən bir qədər əvvəl rəhmətlik Mirzə Ələkbər Sabirin "osmanlıdan tərcümə türkə nə demək" deymi bu gün N.Məhərrəmlinin "məmurluq qayğısı" nəticəsində aktuallaşır.
Getdik e, 100 il geriyə, bax əsl inkişaf belə olar.Yoxsa nə bilim, Turan belə gəldi, türk o yana getdi və s. və filanla inkişaf olmaz. Hər halda "tərəqqi"ni N.Məhərrəmli bizdən yaxşı bilər də, yoxsa o boyda adamı niyə MTRŞ-ə sədr təyin eləsinlər ki?!
Yenə də bu sual ortaya çıxır, biz bir millətik ya yox?
Böyüklər bir millət olduğumuzu deyir, N.Məhərrəmliyə qalsa yox, biz bir millət deyilik, şəkililər deməli, belə haça-paça qalmağın axırı yaxşı olmayacaq.
Aşağıda isə qatıq satırdılar...