Nicat Quliyevin vəkili prezidentə yazdı

Azərbaycan Respublikasının Prezidenti

Cənab İlham Heydər oglu Əliyevə

Açıq məktub

Hörmətli cənab Prezident,

Vaxtilə Azərbaycanın Xarici İqtisadi Əlaqələr Nazirliyinə rəhbərlik etmiş Nicat Quliyev 1 ildən artıqdır ki, həbsdədir.  Onu yaşadığı evin yaxınlığındakı mağazada saxlayıb qollarına qandal vuraraq aparıblar. Sonra da idarə etdiyi avtomobildən guya tapança tapıldığını iddia ediblər. Bununla kifayətlənməyərək gecə saatlarında yaşadığı evdə iki balaca qızının və həyat yoldaşının tək olduqlarını bilə-bilə 30-a yaxın silahlı və maskalı şəxslər hasardan aşaraq evə basqın ediblər. Hətta onu da nəzərə almayıblar ki, bu həyətdə Azərbaycanın dövlətçiliyinin simvollarından biri olan Əhməd Cavadın nəvələri yaşayır. Gecə vaxtı çağırılmayan qonaqların bu tərzdə həyətə soxulmasının hansı vahiməni yaratdığını təsəvvür etmək çətin deyil. Nicat Quliyevin xanımının uşaqlarını sakitləşdirməyindən, həyətə nəzarət imkanının olmadığından sui-istifadə edərək ora bir arsenal silah atıblar.

Nicat Quliyevin həbsinin əsl səbəbləri açıqlanmır. Lakin bunun əslində heç bir əhəmiyyəti də yoxdur. Biz, onun vəkilləri, hüquq müstəvisində Nicat Quliyevin həbsinin süni ittiham sübutları yaratmaqla davam etdirildiyini sübuta yetirmişik. Buna baxmayaraq o, elan edilən ittihama görə nəzərdə tutulan cəzanın maksimum həddində 3 il azadlıqdan məhrum edilib.

Mövcud məhkəmə sistemində hüququn aliliyinə, məhkəmələrin prokurorluğun təsirindən azad, müstəqil, qərəzsiz və ədalətli qərar qəbul etməsinə nail olmaq mümkün deyil, yəni Nicat Quliyevin barəsində ədalətli məhkəmə qərarı veriləcəyinə heç bir ümid yoxdur. 

Cənab Prezident,

Nicat Quliyevin digər vəkili Elton Quliyevdə bu məsələ ilə bağlı Sizə müraciət edib. Mənim mətbuat vasitəsi ilə eyni məsələ ilə baglı müraciət etməyimin səbəbi bu məsələnin Sizin diqqətinizə çatdırılacağı ümidi ilə bağlıdır.  Nicat Quliyevin vəkiliyəm, lakin onu xeyli müddətdir ki, tanıyıram. Sözün həqiqi mənasında ölkəsinə, vətəninə, dövlətçilik təsisatina, qanuna və hüquqa dərin hörmətlə bağlı vətənpərvər və ləyaqətli insandır. Tam məsuliyyət hissi ilə Sizə bildirirəm ki, Nicat Quliyevin işi kimi bilinən cinayət işi qurama, ittihamlar qondarma, dəlillər isə başdan ayağa saxtadır. Məsələnin ən dəhşətli tərəfi isə ondan ibarətdir ki, bu işin qurama olması heç kim üçün sirr deyil – nə ittiham tərəfinə, nə Nicat Quliyevin barəsində həbs qərarı vermiş hakimlərə, nə ictimaiyyət nümayəndələrinə, nə də ki işlə maraqlanan müstəqil hüquqşunaslara. Belə bir vəziyyətdə onun həbsinin davam etdirilməsi, özü də günahsız ola-ola davam etdirilməsi böyük haqsızlıqdır.

Sizə müraciətimin səbəbi də hüquqi fəzada Nicat Quliyevin təqsirsizliyini təsdiq etməyin mümkünsüzlüyüdür. Yaranmış situasiyanın həlli yalnız Sizdən asılıdır. Yalnız Sizin müdaxilənizlə ədalətə nail olmaq mümkündür. Sizdən xahiş edirəm Nicat Quliyevin azadlığa çıxması ilə qanunun aliliyinin, ədalətin, hüququn bərqərar olmasına yardım edin.

Hörmətlə,

Əfqan Məmmədov, vəkil