Rafiq Huseynovla vidalaşaraq... 

Bu gün Rəşid Behbudov adına Mahnı Teatrında tanınmış diktor, görkəmli mədəniyyət xadimi və təkrarsız ziyalı Rafiq Hüseynovla vida mərasimi oldu, mərhum son mənzilə yola salındı. Vida mərasimində tanınmış ziyalılar, ədəbiyyat və mədəniyyət xadimləri, alimlər və jurnalistlər iştirak edirdilər.

Turan agentliyinin əməkdaşı mərasimdə iştirak edən Milli Şuranın sədri, professor Cəmil Həsənlidən mərhum Rafiq Hüseynov haqqında fikirlərini soruşub. Professor C.Həsənli Rafiq Hüseynovu çoxdan tanıdığını deyib, onun Azərbaycan ekranının inkişafında müstəsna xidmətlərini qeyd edib, Rafiq müəllimin respublika mədəniyyətinin inkişafına təkan verən bir ziyalı olduğunu bildirib. O qeyd edib ki, Rafiq Hüseynov öz peşəkarlığı, sadəliyi və dərin erudisiyası ilə örnək yaradan bir ziyalı idi.

"Rafiq Hüseynovla bağlı hansı yaddaqalan xatirəniz var?" sualına Cəmil Həsənli cavab verib ki, çoxlu görüşləri və müzakirələri olub, xüsusi ilə tanınmış ziyalı Rüstəm İbrahimbəyovun evində çox maraqlı söhbətləri olub. "Həmin mənzərə və Rafiq müəllimin həmin müzakirələrdəki işıqlı fikirləri, işıqlı cöhrəsi indi də mənim gözlərimin önündədir və bu gün onun vida mərasimindəki bu izdaham da məhz Rafiq Hüseynovun işıqlı bir şəxsiyyət olması ilə bağlıdır", - C.Həsənli qeyd edib.

Sonra C.Həsənli əlavə edib ki, "vaxtilə İTV-nin ilk yayım şurası Milli Məclisdə təsdiq ediləndə Rafiq Hüseynovun da namizədliyi var idi: "Mən orada çıxış edib bildirdim ki, bu namizədlər içərisində həm peşəkarlığına, həm də mənəvi dəyərlərinə görə yayım şurasına düşməyə haqq edən iki nəfər varsa, onun biri bütün Azərbaycan xaliqinin ekranlardan tanıdığı Rafiq Hüseynovdur. Lakin yuxarıdan gələn seçiləcək adamların içərisində onun adı yox idi.

Deputatlar dini idarənin əməkdaşı, televiziya işinə heç bir aidiyyəti olmayan Hacı Salmana səs verdi, lakin bütün həyatı televiziyada keçən Rafiq Hüseynova səs vermədi. Həmin səsvermə zamanı özünü "ziyalı" hesab edən deputatlar İTV-nin yayım şurasına üzv olmaq üçün Rafiq Hüseynova deyil, Hacı Salmana səs verdilər. Bu, taleyin böyük istehzası idi. Hətta mənim qarşımda Rafiq Hüseynovun əleyhinə səs verən bir şair deputata dedim ki, bizim verəcəyimiz səs heç nəyi dəyişmir, ən azından öz vicdanımızın töhmətindən qurtarmaq üçün Rafiq Hüseynova səs vermək lazım idi. Amma o, çox laqeydcəsinə ciyinlərini çəkməklə tək məni susdurmadı, vicdanının səsini də rahatlıqla boğa bildi. O səsvermədən sonra Rafiq Hüseynovun necə sarsıldığını görmək son dərəcə ağır idi".