Şərlənərək həbsə atılmış hüquq müdafiəçisi Taleh Xasməmmədovun anası Gülbuta Xasməmmədova tərəfindən müraciət

Mən mətbuat vasitəsi ilə Prezident cənab İlham Əliyevə müraciət edib xahiş edirəm, bizim ailəyə kömək edin.Bilirik ki, Siz araşdırıb,  həqiqəti bilib  şərlənərək həbsə atılmış  ciddi xəstə olan günahsız oğlum Talehin azad edilməsinə göstəriş verəcəksiniz. Bu gün Xocalı soyqırımı günüdür.Cənab Prezident  bir ağbirçək ana kimi Sizə bildirirəm ki, and olsun müqəddəs şəhidlərimizin ruhuna 24 fevral 2015-ci il tarixdə Taleh heç bir cinayət törətməyib, əvvəlcədən qurulmuş plana əsasən şərlənərək həbs edilib.Bütün bunlar şəxsən gözümün qarşısında baş verməsəydi mən susardım dinməzdim.Ancaq Talehin necə şərlənməsi gözümün qarşısında baş verdi.Kiçik qızımın 08 martda toyu olacaq deyə mebel maqazininə baxıb çıxıb maşına əyləşmək istəyəndə həmin qondarma zərərçəkən Zahir  adlı şəxs anı olaraq qəfil Talehə yaxınlaşıb üzünə tüpürdü , yaxasından yapışıb yıxıldı yerə və Talehidə yıxdı öz üstünə.Başladı həyasızcasına qışqırmağa.İki dəqiqə çəkmədi iki maşın polislər ora gəldilər,polis rəisinin müavini də onların arasında idi.Sonradan öyrəndik ki, həmin Zahir adlı şəxs polisin "işverənidir" çoxlu sayda cinayət işində şahid və zərərçəkən kimi iştirak edib ki, artıq bunu təsdiq edən sənədlər də əldə edilib. İki gündür Talehdən heç bir xəbər yoxdur.Apardığımız yeməyi də qəbul etmirlər.Hadisənin necə baş verməsini gözü ilə görən çoxlu sayda insanlar var ki, həqiqəti söyləməyə hazır olduqlarını bildirirlər.Həmçinin gizli video çəkliş var ki, artıq əldə etmişik və bunu şəxsən Sizə təqdim edəcəyik.Bir ana kimi inanıram ki,Siz obyektiv həqiqəti görüb bunu edən şəxsləri cəzalandıracaqsınız və şərlənərək həbsə atılmış Talehin dərhal azad edilməsinə göstəriş verəcəksiniz. Biz Sizə inanırıq, çünki, 2012-ci il tarixdə Talehi əfv edib azadlığa, ailəsinə , azyaşlı körpə övladlarına qovuşdurdunuz.Biz bu yaxşılığı heç vaxt unutmarıq.15 nəfərlik ailəmiz köhnə darısqal evdə yoxsulluqla borc  içində yaşayır ki, həmin evdə bankda girovdadır,  Taleh iki ay bundan əvvəl İranda müayinə olunub və həkimlər  ciddi xəstə olmasını bildirirlər.Bu dəfə həbsdə qalsa məhv olacaq, buna görə hazırda ailəmiz gözü yaşlı qalıb yas içindəyik. Biz Sizə inanırıq. Cənab Prezident  bir ağ birçək ana kimi Sizə inanıram və  Sizdən çox-çox xahiş edirəm  şərlənərək həbsə atılmış ciddi xəstə olan oğlum Talehi azad edib doğmalarına, iki körpə balasına qovuşdurasınız.Biz Sizə inanırıq.