Tale Bağırzadə zindandan yazır

Yəmənin gözü yaşlı, unudulmuş, körpə uşaqlarına xatir...

Bu bir həqiqətdir ki, müasir dövrün informasiya texnologiyaları xaqları bir-birinə yaxınlaşdırıb və dünyanın bir ucunda baş verən hər hansı bir hadisəyə o biri ucundan gələn reaksiya ilə, verilən təpki ilə insanlığın vicdanı sınağa çəkilir. Bu gün dünyanın dörd bir yanında baş verən, ürək yandırıcı, acı hadisələr sanki evimizin içində də, gozümüzün qarşısında da baş verməkdədir. Bir tərəfdə ehtiyacın ağır məngənəsində çırpınan aclıqdan, səfalətdən, xəstəlikdən, yalqızlıqdan əziyyət çəkən məzlumlar, digər tərəfdə isə həddi-hüdudu bilinməyən ədalətsizliyin, həyasızlığın və istismarın hökmranlıq etdiyi bir dünya qarşı-qarşısındayıq.

Belə bir vəziyyətdə vicdanımız sınağa çəkilməsin bəs neyləsin?

Olanları izlədikcə hətta bəzən mənə elə gəlir ki, bəşər tarix boyu bu günkü qədər nə bir-birinə bu qədər yaxın olmuş, nə də insanlıq bu cür ağır imtahanla sınağa çəkilmişdir. Bu acı və vəhşətin ortasında bir daha mərhəmətin gücünə sarılıb ölmək üzrə olan vicdanı və bəşəriyyəti yasatmaq üçün yenə də üz tuta bilcəyin ünvana, bəşərin vicdanına üz tutmalı olursan.

Bu qədər acının ortasında necə vicdanımızın səsini boğaraq heç nə olmamış kimi rahatlıqla öz həyatımızı davam etdirə bilərik? Gözümüzün görə - görə necə icazə verə bilərik ki, dünyanın ədalətsiz nizamı, imperialist gücləri bizi öz vicdanımızın qatilinə çevirsin?

Biz vicdanımızın deyil, insanlığın qatillərinə qarşı savaşmaq üçün bu dünyaya göz açdıq. Göz açdıq ki, məzlumlar sonsuz sevgimizi, zalimlər isə dərin nifrətimizi duysun. Onlar, vicdansız zalımlər bir ovuc olduqlari halda, biz dünyanın hər yerində varıq. Vicdanımızın səsini birləşdirib ucaltsaq, vicdansızların bağrını yararıq.

Əziz bacı və qardaşlarım.

Bu gün gözümüzün önündə blokada altına alınmış Yəmənli körpə uşaqlar aclıqdan, xəstəlikdən əziyyət çəkir. Tox dünyanın gözü qarşısında uşaqlar aclıqdan ölür. Bu körpələrin vicdanları sızladan, insanlığın mərhəmət duyğusunu tirtədən acı dolu yaşamında bəhs edən səhnələri izlədikcə bir anlığa insanlığın dəfn edildiyini düşünürsən. Kimdir axı bu körpə uşaqların başına bombalar yağdıranlar, qətlinə fərman verənlər?

Bu gun yəmənli körpə uşaqların başlarına bomba yağdırıb qətilliə sifariş verənlərin kimliyi hər kəsə bəllidir. Dünyanın gözu qarşısında ərəbistanlı tənqidçi jurnalist Cəmal Kaşıkçını Səudiyyənin İstanbul baş konsulluğunda tikə-tikə doğratdıran Səudiyyə rəhbərliyi elə yəmənli uşaqların başına bombalar yağdırıb, qətlinə sifariş verəndir.

Mənim vicdanlarını Səudiyyə rejiminin dollarlarına satan istər demokratik, istərsə də avtoritar olan rejimlərdən heç bir gözləntim yoxdur. Gözləntim, yalnız vicdanlı insanlardandır.

Ey dünyanın mərhəmətli, vicdanlı insanları! Yəmənin unudulmuş, aclıqdan, xəstəlikdən əziyyət çəkən körpə uşaqlarının dəstəyə, yardıma, sevgi və qayğıya indi daha çox ehtiyacı var.

Biz, körpələr yaşasın deyə, Yəmənin blokadasını həm maddi, həm də mənəvi dəstəyimizlə yara bilərik. Bizim də övladlarımız var və gündəlik onlara xərclədiyimiz məbləğin yarısını demirəm, hətta yarısının yarısını ayırıb Yəməndəki körpə uşaqlara göndərə bilsək, onlara az da olsa dəstək olmuş olarıq. Mənəvi dəstəyimizsə o ola bilər ki, Yəməndəki blokada aradan qaldırılan qədər aclıqdan əziyyət çəkən körpə uşaqların dərdlərini bölüşüb hiss edə bilmək üçün biz də hər gün beş saat aclıq aksiyasi keçirək. Yəməndəki ac korpələrə görə 5 saat ac qala bilərikmi?

Viktor Hüqo deyirdi ki, dünyada körpə qığıltısından gözəl himn yoxdur.

Ey dünyanın azad insanları! İndi Yəməndəki körpələrin himnlərini susdurub əvəzində onların fəryadını ucaldan zalımlara qarşı birləşin! Ey körpələr ağlayarkən namazını belə tez bitirən İslam peygəmbəri Həzrəti Muhəmmedin (s.ə.v.v) ümməti. Yəməndəki körpələri unutmayaq. Bu gün Tanrı hamımızın insanlıq sevdasını sınağa çəkir. Yəni başımızda baş verənlərə laqeyd qalmaqla bu sınaqdan üzü ağ çıxa bilməyəcəyik. Ruhumuzu təmiz və saf şəkildə Tanrıya təslim etməyin yolu insanlığımızı bəsləyən vicdan və mərhəmətimizi canlı tutmaqdır. Bu üzdən dünyada və Yəməndə əziyyət çəkən körpə övladlarımızı unutmayaq.

Tanrı hamınızı qorusun.